काठमाडौं । नेपाल छिर्नै लागेका दुई झुण्ड सलह मध्य प्रदेशतिर लागेका छन् । बिहीबारको अध्यावधिक जानकारीअनुसार नेपालको सिमानाबाट सबैभन्दा नजिक रहेको सलहको झुण्ड बिहान ६ बजे भारतको उत्तर प्रदेशको इटावा क्षेत्रमा १०० हेक्टर र ५५ हेक्टर क्षेत्रफलमा २ वटा झुण्ड रहेका थिए ।

तर, आब ती झुण्ड हावाको बहावसँगै मध्येप्रदेशतर्फ लागेका हुन् । प्लान्ट क्वारेन्टिन तथा विषादी व्यवस्थापन केन्द्रका  सूचना अधिकारी रामकृष्ण सुवेदीका अनुसार ती झुण्ड शनिबारसम्म हावाको बहावको पूर्वानुमान अनुरुप नेपाल आउने अनुमान लगाइएको थियो । तर, अहिले त्योभन्दा टाढा गएका छन् ।

उनले बाह्रखरीसँग भने, “सलहका ती झुण्ड मध्य प्रदेशतर्फ लागेका छन् । अब २–४ दिन यता आउने सम्भावना कम छ ।”

हावा पूर्वबाट पश्चिम लागेका कारण उनीहरु फर्किएको दाबी उनले गरे ।

यसो त नेपालभर देखिएका सलहका पुराना झुण्ड बिस्तारै हराउन थालेका छन् । प्यूठान र दाङमा धेरै संख्यामा देखिएका ती झुण्डले त्यहाँको बालीमा धेरै असर गरेर त्यहाँबाट पश्चिम लागेको सुवेदीको जानकारी छ ।

यसो त सबै झुण्ड तितरवितर भएका कारण संख्या घटेको छ । सुवेदीले थपे, “अब केही दिन डराउने पर्ने कारण छैन ।”