काठमाडौं । नेपालमा कोरोना भाइरस (कोभिड–१९) संक्रमितको संख्या ४०२ पुगेको छ । सोमबार एकै दिन २७ संक्रमित थपिएका थिए । जसमा २४ पुरुष र तीन महिला थिए ।
यसअघि सोमबार एकैदिन ८० जनामा कोरोना पुष्टि भएको थियो । हालसम्म संक्रमित ४०२ मध्ये ३७ जना उपचारपछि निको भएर अस्पतालबाट घर फर्किसकेका छन् ।
हालसम्म कोरोना संक्रमणका कारण दुईजनाको मृत्यु भएको छ ।
सञ्चार माध्यमका लागि सूचना संकलनमा खटिएका पत्रकारमा पनि संक्रमण देखिए पछि पत्रकारहरुले पनि परीक्षण गराउन सुरु गरेका छन् । कोेरोना परीक्षणमा खटिएका एकजना चिकित्सकमा पनि संक्रमण पुष्टि भएको छ ।
स्वास्थ्य मन्त्रालयका अनुसार कोरोना संक्रमण देखिने जिल्लाको संख्या ३६ पुगेको छ ।
हालसम्म पीसीआर विधिबाट ३२ हजार ६०४ जनाको कोरोना परीक्षण गरिएको छ भने ७४ हजार ६४९ को आरडीटी परीक्षण गरिएकोछ ।
हाल ४५७ जना आइसोलेसनमा रहेको स्वास्थ्य मन्त्रालयले जनाएको छ । क्वारेन्टाइनमा २१ हजार ६२३ जना बसेका छन् ।
कोरोना संक्रमण फैलिन नदिन सरकारले जेठ २० गतेसम्म देशभर लकडाउन गरेको छ ।
