काठमाडौं । नोभल कोरोना भाइरस (कोभिड–१९) का कारण ज्यान गुमाएकी महिलाको घर रहेकोे जिल्लाको बाह्रबिसे नगरपालिका वडा नं ९ राम्चे गाउँबाट परीक्षणका लागि ५५ जनाको थ्रोट स्वाब संकलन गरिएको छ ।
स्वाब संकलन आज पनि जारी छ ।
महिलाको मृत्युलगत्तै शनिबार देखि शील गरिएको बाह्रबिसे नगरपालिकाका वडा नं ९ मा रहेको राम्चे ठोट्नेरीका बासिन्दाको आइतबार कोरोना परीक्षणका लागि बाग्मती प्रदेश जनस्वास्थ्य प्रयोगशालाका निर्देशक डा. नारायण कार्कीसहितको स्वास्थ्य टोलीले स्वाब संकलन गरेको हो ।
संकलित स्वाबको परीक्षण रिपोर्ट पछि महिलाबाट परिवार, आफन्त र समुदायमा कोरोना सरे नसरेको थाहा पत्ता लाग्ने छ । गाउँकी २९ वर्षीय सुत्केरीको मृत्यु कोरोनाका कारण भएको पुष्टि भएपछि ठोट्नेरी गाउँ त्रासमा छ ।
मृत्यु भएकी महिलाको शिशुसहित परिवारका सदस्यको भने रिपोर्ट नेगेटिभ आइसकेको छ ।
वाग्मती प्रदेशको प्रदेश स्वास्थ्य निर्देशानलय सहितको स्वास्थ्य टोलीले पहिलो घेरामा कम्तीमा १ सय जनाको पीसीआर परीक्षणका लागि सूची तयार पारेको सामजिक विकास मन्त्री युवराज दुलालले जानकारी दिएका छन् ।
