काठमाडौं । अभिनेता धिरज मगर सिनेमाको छायांकनका क्रममा आफ्नै जन्मभूमि पुगेका छन् । आफ्नै जन्मभूमि रुकुमको मैकोट पुग्दा धिरजलाई स्थानीयले भब्य स्वागत गरेका थिए । मैकोटमा जन्मिएका उनी दुई वर्षको उमेरमा यूके गएका थिए ।

धिरज र अभिनेत्री उपासना सिंह ठकुरीको मुख्य भूमिका रहेको चलचित्र ‘खुस्मा’को दोस्रो चरणको छायांकन सुरु भएको छ । गत माघमा मनाङमा पहिलो चरणको छायांकन गरेको सिनेमाको दोस्रो चरणको छायांकन पूर्वी रुकुमको मैकोटबाट सुरु भएको हो ।

निर्देशक अशोक थापा मगरले बिहीबारबाट सुरु भएको छायांकन पुन मगरको उद्गम स्थल रुकुमको मैकोट, टकसेरा र कास्कीको पोखरामा गरिने बताए । प्रेमकथामा आधारित सिनेमाले जनयुद्धको प्रभावबीच अंकुराएको प्रेमलाई पर्दामा देखाउनेछ ।

सिनेमामा धिरज र उपासनासँगै अलवा माओत्से गुरुङ, खड्क बहादुर पुन(खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, सारा राई, श्वेता मिश्र, विवेश मगरलगायत कलाकारको अभिनय रहेको छ ।

सिनेमाको कथा पनि निर्देशक थापा मगर आफैँले लेखेका छन् । 

सिनेमाका निर्मातामा वीरबहादुर लामा, चन्द्रबहादुर भट्टचन र बेतान मगर छन् । सह–निर्मातामा मानबहादुर धनाह मगर र सुस्मिता बुढाथोकी हुन् । मोहन राई कार्यकारी निर्माता रहेको चलचित्रमा दीपक बज्राचार्यको छायांकन रहनेछ ।