काठमाडौं । भारतले उत्तराखण्डबाट नेपाली भूमि लिपुलेक हुँदै चीनको मानसरोवर जाने सडक बनाएको भूभाग आफ्नै भएको भारतले दाबी गरेको छ ।
भारतीय विदेश मन्त्रालयले शनिबार एक विज्ञप्ति जारी गर्दै भर्खरै उत्तराखण्ड राज्यको पिथौरागढ जिल्ला हुँदै मनाइएको कैलाश मानसरोवर यात्रा रुट पूर्णरुपमा भारतीय भूमि भएको जनाएको छ ।
विज्ञप्तिमा भनिएको छ, "नेपालको परराष्ट्र मन्त्रालयले भारतले शुक्रबार उद्घाटन गरेको सडकका विषयमा सम्बन्धित विज्ञप्ति जारी गरेको देख्यौं । उत्तराखण्ड राज्यको पिथौरागढ जिल्लामा बनाएर भर्खरै उद्घाटन गरिएको सडक पूर्णरुपमा भारतीय भूभागमा पर्छ । कैलाश मानसरोवर जाने तिर्थालुहरुले पहिलेदेखि प्रयोग गर्दै आएको रुटलाई तिर्थालु, स्थानीय र व्यापरीहरुका लागि सहज र सुविधाजनक बनाइएको हो ।"
भारत र नेपालले सीमा समस्या समाधानका लागि संयन्त्र बनाएको छ । सम्पूर्ण विवादित सीमा समस्याहरु समाधानका लागि पहल भइरहेको र सीमा समस्या समाधान कुटनीति संवादमार्फत द्विपक्षी मैत्री र छिमेकी सम्बन्धका आधारमा अघि बढाइनले भारतले जनाएको छ ।
दुबै पक्षले परराष्ट्र सचिवस्तरीय वार्ताका लागि पहल भइरहेको र चाँडै वार्ता गरेर दुबै पक्षका समस्या समाधान गरिने विज्ञप्तिमार्फत जनाइएको छ ।
यसअघि नेपालको परराष्ट्र मन्त्रालयले एक विज्ञप्ति जारी गर्दै भारले बनाएको मानसरोवर यात्रा रुट नेपाली भूभागमा भएकोले तत्काल कुनै पनि गतिविधि उक्त क्षेत्रमा नगर्न भारतलाई आग्रह गरेको थियो ।