विराटनगर । प्रदेश १ मा द्रुत परीक्षण विधि (आरडीटी) र ल्याबमा गरिने परीक्षणबाट शुक्रबारसम्म जम्मा ८ हजार ९९७ जनामा नमुना परीक्षण भएको छ । कोरोना भए नभएको पत्ता लगाउन दुवै विधिबाट नमुना परीक्षण गरिएको हो ।
मुख्यमन्त्री तथा मन्त्रिपरिषद् कार्यालय मातहतको कोरोना सूचना डेस्कका अनुसार यसरी परीक्षण गरिएकामध्ये आरडीटीतर्फ ७ हजार २०२ जनाको नमुना परीक्षण भएको छ । जसमा ७ हजार १८४ जनाको रिपोर्ट नेगेटिभ आएको छ । पीसीआरबाट १ हजार ७९५ जनाको नमुना परीक्षणका लागि ल्याबमा पठाइएको छ । तीमध्ये एक हजार ७१८ जनाको रिपोर्ट नेगेटिभ आएको छ ।
यता, प्रदेश सरकारले निर्माण गरेका क्वारेन्टाइन स्थलमा बस्नेको संख्या शुक्रबारसम्म कुल १ हजार २१२ छ । आइसोलेसनमा स्वास्थ्यकर्मीको निगरानीमा ३ जना छन् । होम क्वारेन्टाइनमा जम्मा ७ हजार ८३५ जना बसिरहेको मुख्यमन्त्री तथा मन्त्रिपरिषद् कार्यालयले जनाएको छ ।
प्रदेश सरकारले विराटनगरमा निर्माण गरेको कोसी कोभिड १९ उपचार केन्द्रबाट शुक्रबारसम्म एक महिलासहित १४ जना डिस्चार्ज भएका छन् । त्यहाँ ३१ जना संक्रमित उपचाररत थिए ।
