एजेन्सी । विश्वभर महामारीका रूपमा फैलिएको कोरोना भाइरसका कारण विश्व खेलकुद क्षेत्रमा धेरै असर परेको छ । खेलकुदका विभिन्न गतिविधि स्थगित पनि भएका छन् ।
कोरोनाकै कारण विश्व खेलकुदको महाकुम्भ ‘टोकियो ओलम्पिक’ पनि एक वर्षका लागि सरेको छ । यस्तो अवस्थामा युरोपियन फुटबल लिगहरू पुनः सुरु गर्ने योजनामा छन् । उनीहरूले नयाँ मितिका लागि पनि छलफल गरिरहेका छन् ।
विश्व फुटबलको सर्वाेच्च निकाय फिफाले भने यस विषयमा फरक मत राखेको छ । फिफाका अध्यक्ष जियनी इन्फान्टिनोले भने युरोपियन फुटबल लिगहरू यति चाँडै आरम्भ गर्नु गैरजिम्मेवारपूर्ण कुरा हुने बताएका छन् ।
“हाम्रो नियममै खेलाडीहरूको स्वास्थ्य पहिलो प्राथामिकतामा भन्ने छ । त्यसैले यो संकटकालको अन्त्य नहुँदासम्म युरोपियन लिगहरू छिटै सुरु गर्नु गैरजिम्मेवारपूर्ण हुनेछ । अहिले कुनै पनि खेल खेलाउनु खेलाडीको स्वास्थ्यसँग खेलबाड गर्नुसरह हुनेछ,” उनले रोयल स्पेनिस फुटबल फेरेडेसनलाई सल्लाह दिने क्रममा भने ।
हाल जर्मन क्लब वयार्न म्युनिखले आफ्नो प्रशिक्षण सुरु गरेको छ । जर्मन बुन्डेस लिगा फुटबल जुनबाट पुनः सुरु गर्ने योजनामा छ । विश्व फुटबलका विज्ञहरूले यस्तो अवस्थामा प्रशिक्षण गराउन ठूलो चुनौती भएको पनि बताएका छन् ।
