काठमाडौं । विश्व फुटबलको सर्वोच्च निकाय (फिफा) ले आज सार्वजनिक गरेको वरीयतामा नेपाल यथावत् रहन सफल भएको छ ।

फिफाले सार्वजनिक गरेको नयाँ वरीयताअनुसार नेपाल १७०औँ स्थानमै छ । गत महिना पनि नेपाल १७०औँ स्थानमै थियो । दक्षिण एसियाली राष्ट्रमा भने नेपाल तेस्रो स्थानमा छ । नेपालभन्दा भारत र माल्दिभ्स अगाडि छन् । भारत १०८औँ स्थानमा रहँदा माल्दिभ्स १५५औँ स्थानमा छ ।

नेपालभन्दा तल भुटान, बंगलादेश, श्रीलंका र पाकिस्तान छन् । भुटान १८९औँ स्थानमा छ भने बंगलादेश १८७औँ स्थानमा छ । त्यसैगरी पाकिस्तान २००औँ स्थानमा रहँदा श्रीलंका २०६औँ स्थानमा छ । 

नयाँ वरीयताको शीर्ष स्थानमा बेल्जियम छ । फ्रान्स दोस्रो स्थानमा छ भने ब्राजिल तेस्रो, इङ्ल्यान्ड चौथो तथा उरुग्वे पाँचौँ स्थानमा छन् । -रासस