एजेन्सी । बलिउड पाश्र्व गायिका कनिका कपुर लखनउस्थित पीजीआई अस्पतालमा उपचार्थ छिन् । २० मार्चमा कोरोना भाइरस पोजेटिभ देखिएको उनको पछिल्लो पाँचौं रिपोर्ट पनि पोजेटिभ नै आएको छ ।
पाँचौं रिपोर्ट पनि पोजेटिभ आएपछि कनिका अब घर जान छैटौं रिपोर्ट नेगेटिभ आउने आशामा छिन् । तर हालै कनिकाको परिवारले उनमा अब कोरोनाको लक्षण नरहेको र उनको स्वास्थ अवस्था पनि सामान्य रहेको बताएका छन् । उनमा अब कोरोना संक्रमणको लक्षण नरहेको र अब घर जान नेगेटिभ रिपोर्टको प्रतीक्षामा रहेको उनको परिवारले जनाएको छ ।
गत साता मात्रै चौथो रिपोर्ट पनि पोजेटिभ आएपछि कनिकाले सामाजिक सञ्जालमार्फत भावुक पोस्ट सेयर गर्दै घर फर्किन निकै आतुर रहेको बताएकी थिइन् ।
लन्डनबाट भारत आएपछि सय जनाभन्दा बढीको उपस्थितिमा उनले आफ्नो जन्मोत्सव मनाएकी थिइन् । तर ती कोही पनि व्यक्तिमा कोरोना पोजेटिभ नभएको पनि भारतीय मिडियाले बताएका छन् । (नवभारत टाइम्स)
