काठमाडौं । विश्व स्वास्थ्य संगठन (डब्ल्यूएचओ) ले एसिया र प्यासिफिक क्षेत्रमा नोभेल कोरोना भाइरसको संक्रमण नियन्त्रण नआइसकेको बताएको छ ।
डब्लूएचओका क्षेत्रीय निर्देशक ताकेशी कासाईले मंगलबार भिडियो ट्विटमार्फत एसियामा कोरोना भाइरसको संक्रमण अझै नियन्त्रण बाहिरै रहेकोले सजगता अपनाउन आग्रह गरेका छन् ।
डब्ल्यूएचओका क्षेत्रीय निर्देशक कासाईले अहिले एसियामा देखिएको स्थिर अवस्थाको लाभ लिँदै देशहरूले समुदायमा कोरोना भाइरस थप फैलिन नदिने अवस्था सिर्जना गर्न जोड दिएका छन् ।
अन्य देशमा महामारी फैलिने क्रम जारी रहेको बताउँदै उनले भाइरसलाई नियन्त्रणमा लिने प्रयासमा रहेका एसियाली मुलुकले पनि आफ्नो सुरक्षा व्यवस्था कमजोर हुन नदिने वातावरण तयार गर्न सुझाव दिएका छन् ।
पहिलो पटक कोरोनाको संक्रमण देखिएको चीन, दक्षिण कोरिया, सिंगापुरलगायतका एसियाली मुलुकहरुमा कोरोना भाइरस नियन्त्रणतर्फ रहेको पछिल्ला कोरोना संक्रमणका तथ्यांकहरुले जनाएका छन् ।
चीनमा दुई महिना लामो लकडाउन र आवतजावतका साथै सोसल डिस्टन्सिङलगायतका प्रतिबन्धहरु र तीव्र परीक्षण र उपचार प्रणालीको सक्रियतापछि संक्रमणको दर नियन्त्रणमा आएको हो ।
