तनहुँ । म्याग्दे गाउँपालिकाले सहायताको नाममा चन्दा नउठाउन र आफू खुसी राहत वितरण नगर्न संघ संस्था तथा व्यक्तिलाई आग्रह गरेको छ । म्याग्दे गाउँपालिका अध्यक्ष मायादेवी रानाको अध्यक्षतामा गाउँपालिकाको मंगलबार बसेको बैठकले कुनै पनि व्यक्तिलाई सहायता गर्नुपरेमा गाउँपालिकाबाट स्वीकृत लिन पनि आग्रह गरेको छ । 

संघ संस्था वा व्यक्तिले दिने सहयोगलाई एकद्वार प्रणालीबाट वितरण गर्न, पारदर्शिता कायम गर्न र लक्षित समुदायका व्यक्तिसम्म पुगोस् भनेर यस्तो निर्णय गरिएको गाउँपालिकाका प्रमुख प्रशासकीय अधिकृत हरिराम नागिलाले बताए । गाउँपालिकाले ७ वटै वडाका परिवार संख्या, रोजगारीको अवस्था, आश्रित परिवार संख्या लगायतका विवरणहरू २ दिन भित्र गाउँपालिकामा पठाउन पनि भनिएको छ । 

सोही आधारमा राहत वितरण गरिने गाउँपालिकाले जनाएको छ । विपत व्यवस्थापन कोषमा गाउँपालिकाले २५ लाख वजेट विनियोजन गरेको पनि जनाएको छ ।