इलियोनिस । संयुक्त राज्य अमेरिकाको संघ सरकारले राज्य सरकारलाई एन-९५ मास्क भनेर सर्जिकल मास्क पठाएको छ । इलियोनिसका गर्भनर जेबी प्रिटज्केरले ह्वाइट हाउसले तीन लाख एन-९५ मास्क पठाउने प्रतिबद्धता जनाएको भए पनि सर्जिकल मास्क पठाएको बताएका छन् ।
उनले सोमबारको पत्रकार सम्मेलनमा भने, "मेरो टिमले केन्द्र सरकारले पठाएको तीन लाख मास्कमा एन-९५ मास्क खोजिरहेको छ, जुन केन्द्र सरकारले मलाई नै एन-९५ मास्क पठाउने भनेको थियो । तर, अहिलेसम्म एन-९५ मास्क भेटिएका छैनन् । यहाँ पठाइएका सबै सर्जिकल मास्क हुन् । जुन हामीलाई अहिले चाहिएको छैन ।"
"संघ सरकारको कति आवश्यकता छ भन्ने विषयमा म धेरै ब्याख्या गर्दिन । तर, पीपीको आकार अझै बढाउनुपर्छ । मुलुकभर पीपीईको माग बढिरहेको छ," उनले थपे ।
इलियोनिसमा केन्द्र सरकारले मेडिकल सामग्री पठाएको यो तेस्रो पटक हो । तर, जति राज्यमा आवश्यकता छ, त्योभन्दा निकै कम सामग्री सरकारले पठाएको गर्भनरको आरोप छ ।
उनले राष्ट्रपति डोनाल्ड ट्रम्पले रक्षा उत्पादन ऐन ल्याएर पीपीई उत्पादनका लागि विभिन्न कम्पनीहरुलाई अनुमति दिनसमेत आग्रह गरेका छन् ।
इलियोनिसमा हालसम्म ५ हजार ५७ कोरोना संक्रमित फेला परेका छन् भने ७३ जनाको मृत्यु भएको छ । - सीएनएन