मस्को । रुस सरकारले नागरिक उडड्यन प्राधिकरणलाई सम्पूर्ण अन्तर्राष्ट्रिय उडानहरु रोक्न निर्देशन दिएको छ । रुसबाट उड्ने र रुस आउने सम्पूर्ण उडानहरु मार्च २७ देखि रोक्न निर्देशन दिइएको रुसको सरकारी वेबसाइटले जनाएको छ ।
तर, विभिन्न मुलुकमा रहेका रुसी नागरिकहरुलाई उद्धार गरेर ल्याउन भने सरकारको विशेष निर्णयमार्फत् उडानहरु सञ्चालन गर्न सकिने बताएको छ । उडानहरु शुक्रबार मध्यरातिदेखि प्रतिबन्ध गरिनेछन् ।
रुसमा एकैदिन १६३ जनामा कोरोना संक्रमण देखिएपछि रुस सरकारले बुधबार यस्तो निर्णय गरेको हो । रुसमा हालसम्म कोरोना संक्रमितको संख्या ६५८ पुगेको छ ।
सरकारले आन्तरिक उडानहरु भने यथावत सञ्चालन हुने जनाएको छ । रुस सरकारले विभिन्न मुलुकमा रहेका रुसी नागरिकहरुलाई त्यहाँको सरकारको प्रतिबन्धका कारण स्वदेश फर्कन नसक्नेहरुलाई भने सुरक्षित रहन आग्रह गरेको छ ।
रुसले गत साता नै आफ्ना सम्पूर्ण सीमानाका बन्द गरिसकेको छ । मार्च सुरुआतमै युरोपियन युनियनका सदस्य राष्ट्रहरुबाट हुने उडानहरु स्थगित गरेको थियो ।
त्यसैगरी मस्कोका मेयर सर्गेइ सोब्यानिनले नगरका सम्पूर्ण पार्क, क्याफे, रेस्टुरेन्ट र मलहरु आगामी सातादेखि बन्द गरिने बताएका छन् । - साउथ चाइना मर्निङ पोस्ट