काठमाडौं । विश्वभर महामारीको रुपमा फैलिरहेको नोभेल कोरोना भाइरस अर्थात कोभिड-१९ को विषयमा छलफल गर्न आकस्मिक जी–२० बैठक बोलाइएको छ ।
सन् २०१९ को डिसेम्बरमा चीनको वुहानबाट सुरु भएको नोभेल कोरोना भाइरसको संक्रमण फैलिएको करिब तीन महिनापछि ठूलो अर्थतन्त्र भएका मुलुकहरुको समूह जी-२० सदस्य राष्ट्र प्रमुखहरुको आकस्मिक भिडियो सम्मेलन बिहीबार हुने भएको छ ।
यस वर्षको जी-२० सम्मेलनको अध्यक्षता साउदी अरेबियाले गर्दैछ । आज हुने भिडियो सम्मेलनबाट कोभिड-१९ दोहोरिने खतराबाट बच्न व्यवहारिक उपायमा बारेमा छलफल हुनसक्ने बताइएको छ ।
त्यसैगरी युरोपियन युनियनका २७ नेताहरुले पनि भिडियो सम्मेलनमार्फत कोभिड-१९ विरुद्ध लड्ने साझा धारणा बनाउने बताइएको छ ।
विश्व बैंक र अन्तर्राष्ट्रिय मुद्रा कोषले आज हुने जी-२० भिडियो सम्मेलनमार्फत विश्वका ७६ गरिब राष्ट्रहरुमा तत्काल द्विपक्षीय ऋण साहयता उपलब्ध गराउने अपेक्षा गरेका छन् । संयुक्त राष्ट्र संघले बुधबार दुई अर्ब अमेरिकी डलर बराबरको मानवीय सहायता कोष स्थापना गरी गरिब मुलुकहरुलाई राहत उपलब्ध गराउने घोषणा गरेको छ ।
जी-२० मा बलियो अर्थतन्त्र भएका १९ राष्ट्रहरु र युरोपियन युनियनकोको संलग्नता रहेको छ । - दि गार्जियन