क्वालालम्पुर । मलेसियाले कोरोना भाइरस नियन्त्रणका लागि गर्ने आंशिक लकडाउन लागु गराउन सेना परिचालन गर्ने भएको छ । सरकारले आइतबारदेखि प्रतिबन्धित क्रियाकलापहरु हुन नदिन प्रहरीलाई सहयोग गर्ने गरी सेना परिचालन गर्न लागेको हो ।
मलेसियाका रक्षामन्त्री स्माइल साबरी याकोबले स्थितिको अवलोकन गर्न र मानिसहरु घरबाहिर ननिस्केको यकिन गर्न प्रहरी सघाउन सेना परिचालन गर्न लागेको बताएका छन् । ६० प्रतिशत मानिसहरुले बुधबारदेखि नै यस्तो गरिरहेको बताए । आंशिक प्रतिबन्ध लगाएको पहिलो दिन प्रहीले सयौं सडकहरु बन्द गराएको थियो भने हजारौं सवारी जाँच गरेको थियो ।
मलेसियामा सोमबार आंशिक लकडाउन घोषणा गरिएको हो । जसअन्तर्गत नागरिकलाई मार्च अन्तिमसम्ममा घर बाहिर ननिस्किन आग्रह गरिएको थियो । तर, आवश्यक वस्तु खरिद, सामान डेलिभरी र स्वास्थ्य सेवाका लागि भने खुला गरिने बताइएको थियो ।
विदेश जान प्रतिबन्ध लगाइएको छ भने काम, अध्ययनलगायतका कामका लागि सिंगापुर गएका चार लाख मानिसहरुलाई फर्किनसमेत बन्देज गरिएको छ ।
कसैले पनि सरकारको निर्देशन उल्लंघन गरेमा छ महिना जेल अथवा दुबै सजाय हुनसक्ने बताइएको छ । रक्षामन्त्री साबरीले मानिसहरुले बाहिर खेल्न जाने, रेस्टुरेन्टलगायतका ठाउँमा जम्मा हुने गतिविधि नरोकेकोतर्फ ध्यानाकर्षण भएको र सचेत हुन आग्रह गरेका छन् ।
मलेसियामा हालसम्म कोरोना संक्रमितको संख्या ९०० पुगेको छ भने दुईजनाको मृत्यु भएको छ । दक्षिण पूर्वी एसियाकै उच्च संक्रमित मलेसियामा भएकोसमेत बताइएको छ । - साउथ चाइना मर्निङ पोस्ट
