काठमाडौं । स्थानीय तहको रिक्त सदस्य पदका लागि यही मंसिर १४ गते शनिबार हुने उपनिर्वाचनका उम्मेदवारलाई आज निर्वाचन चिह्न प्रदान गरिएको छ ।

स्थानीय तहका उमेदवारलाई शान्तिपूर्ण वातावरणमा आज निर्वाचन चिह्न प्रदान गरिएको निर्वाचन आयोगका सहायक प्रवक्ता सूर्यप्रसाद गौतमले जानकारी दिए । निर्वाचन चिह्न पाएसँगै उमेदवारबाट निर्वाचन प्रचार प्रसार सुरू भएको छ ।

स्थानीय तहको उपनिर्वाचनका लागि उपमहानगरपालिका प्रमुख १, गाउँपालिकाका अध्यक्ष ३, उपाध्यक्ष १ र गाउँपालिका तथा नगरपालिकाका  वडाध्यक्ष ४३ सहित ४८ पदका लागि २७३ जनाको उमेदवारी कायम रहेको छ ।

निर्वाचन आयोगका अनुसार,  धरान उपमहानगरपालिकाको प्रमुुखका लागि २३, पाँचथरको फाल्गुनन्द गाउँपालिका अध्यक्षका लागि ८, मोहत्तरीको पिपरा गाउँपालिका अध्यक्षका लागि २०, संखुवासभाको मकालु गाउँपालिकाको अध्यक्षका लागि ७ जनाको उमेदवारी कायम भएको छ । 

हुम्लाको खर्पुनाथ गाउँपालिकाको उपाध्यक्षका लागि  भने ३ जनाको मात्र उम्मेदवारी परेको छ । स्थानीय तहका उम्मेदवारले चुनाव प्रचार प्रसारका लागि १० दिनको अवधि पाएका छन् । - रासस