चितवन । सेनाका जवान स्थानीय राम कँडेलको रहस्मय मृत्यु भएको भन्दै स्थानीयले पृथ्वी राजमार्गको मुग्लिङ्ग–काठमाडौं जोड्ने बाटो अवरुद्ध गरेका छन । इच्छाकामना गाउँपालिका– ५ का २८ वर्षीय राम कँडेलको अस्थाई प्रहरी पोष्ट फिस्लिङ नजिकैको भीरबाट लडेर मृत्यु भएपछि स्थानीयले बाटो अवरुद्ध गरेका हुन् ।
चितवनको इच्छाकामना गाउँपालिका वडा नम्बर पृथ्वी राजमार्ग फिस्लिङमा आज १२ बजेदखि स्थानीयले काठमाडौं जोड्ने राजमार्ग अवरुद्ध गरेको मुग्लिन प्रहरीले जनाएको छ ।
गएराति इच्छाकामना मन्दिरमा लागेको मेला हेरेर बिहान फर्किने क्रममा सार्वजनिक गाडीभित्र कँडेलले अभद्र व्यवहार गरेपछि उनलाई सँगै रहेका प्रहरी जवान ठाकुर ढकालले अस्थाइ प्रहरी पोष्ट फिस्लिङमा राखेका थिए । प्रहरी जवान शौचालय गएपछि चौकीबाट भाग्न खोज्दा कँडेलको भीरबाट लडेर मृत्यु भएको जिल्ला प्रहरी कार्यालय चितवनका प्रमुख दानबहादुर मल्लले जानकारी दिए ।
मृतक कँडेलको शव पोष्टमार्टमको लागि भरतपुर अस्पतालमा राखिएको छ । मृतक कँडेल नेपाली सेनाको वर्दबहादुर गण सिन्धुलीमा जवानका रुपमा कार्यरत रहेका थिए । अहिले स्थानीय र प्रहरी प्रशासनबीच छलफल भईरहेको छ ।