विराटनगर । प्रदेश १ को राजधानी विराटनगरमा मंगलबारबाट दोस्रो कालुराम सुरजमल स्मृति प्रदेश १ स्तरीय खुला ब्याडमिन्टन प्रतियोगिता सुरू भएको छ । विराटनगर ब्याडमिन्टन क्लबले आयोजना गरेको ब्याडमिन्टन प्रतियोगिताको मंगलबार प्रदेशका सामाजिक विकास मन्त्री जीवन घिमिरेले उद्घाटन गरेका छन् ।
प्रतियोगिताको उद्घाटन गर्दै मन्त्री जीवन घिमिरेले भने,‘‘प्रदेश १ लाई खेलकुदका माध्यमबाट चर्चित बनाउने सरकारको तयारी छ ।’’ घिमिरेले खेलकुदको विकासमा सरकारले ध्यान दिने बताए । बैजनाथपुर रंगशालालाई प्रदेश सरकारले अन्तर्राष्ट्रियस्तरको रंगशाला बनाउने योजना बनाएको दाबी गर्दै सहिद रंगशालामा रात्रिकालीन खेल गराउन सक्ने गरी काम अघि बढाएको जानकारी दिए ।
प्रतियोगिताअन्तर्गत मंगलबार भएका सबै इन्भेटमा विजयी भएका खेलाडी क्वार्टरफाइनलमा प्रवेश गरेका छन् । मेन्स डबल्सतर्फ सुनसरीका भोजबहादुर गुरुङ र कुसुम मगरको जोडीले विष्णु ढुंगेल र दीपक पोखरेलको जोडीलाई पराजित गरेको छ । झापाका नवीन सिलवाल र चाणक्य पाठकको जोडीले मुनाहाङ राई र आभाष चौधरीको जोडीलाई पराजित गरेको छ ।
त्यस्तै सुनसरीको तुलसी सुवेदी र राजु कटवालको जोडीले मोरङको विनय चौधरी र जोनी जसराजको जोडीलाई पराजित गरेको छ । सिन्धुलीको दीपेन्द्र बस्नेत र कुमार रमौलीको जोडीले सुनसरीका रकम लिम्बू र सुरेश लिम्बूको जोडीलाई पराजित गरेको छ । सुनसरीको रविन सुडेन र प्रकाश राईको जोडीले लोकपु शेर्पा र मन्दीप घलेको जोडीलाई पराजित गरेको छ ।
सुरोज खवास र अजय चौधरीको जोडीले शिवकुमार धिमाल र रगेन्द्र साम्बाको जोडीलाई पराजित गरेको छ । विनोद डाँगी र इन्द्र योङहाङको जोडीले आवाज ओढारी र पंकज कुशहवाको जोडीलाई पराजित गरेको छ ।
त्यसैगरी भेट्रान ४५ वर्षमाथिका सबै खेलाडी विजयी हुँदै क्वार्टरफाइनलमा प्रवेश गरेका छन् । विजयी हुनेहरू किरण प्रधान र योगन्द्र श्रेष्ठको जोडीले विष्णु आचार्य र शम्भु श्रेष्ठको जोडीलाई पराजित गरेको छ । सुदीप श्रेष्ठ र श्री धिमालको जोडीले विष्णु बस्नेत र विष्णु ढुंगेलको जोडीलाई पराजित गरेको छ । पदम धिमाल र भूपाल प्रसाईंको जोडीले मनोज लाखे र राम श्रेष्ठको जोडीलाई पराजित गरेको छ । सुनसरीको श्याम लामा र सुरेश कार्कीको जोडीले मोरङका किरणसिंह बस्नेत र पुष्प शाक्यको जोडीलाई पराजित गरेको छ ।
प्रतियोगिताको उद्घाटनमा प्रदेशसभाका सदस्य शिवनारायण सिंह, कुलबहादुर साम्बालगायतले शुभकामना व्यक्त गरेका थिए । प्रतियोगितामा मास्टर ५५ वर्षमाथि, मास्टर ४५ वर्षमाथि र मेन्स डबल्समा ६५ टिमको सहभागिता छ । प्रतियोगिता कात्तिक ७ गतेसम्म हुनेछ ।
