पाकिस्तानका प्रधानमन्त्री इमरान खान र अमेरिकी राष्ट्रपति डोनाल्ड ट्रम्पबीच आज भेट हुने भएको छ । संयुक्त राष्ट्रसंघको ७४ औं महासभाको औपचारिक उद्घाटन हुनुभन्दा एक दिनअघि न्यूयोर्कमा राष्ट्रपति ट्रम्प र प्रधानमन्त्री खानबीच भेट हुन लागेको हो ।
यसअघि जुलाईमा राष्ट्रपति ट्रम्प र प्रधानमन्त्री खानबीच भेट भएको थियो । उक्त भेटका क्रममा भएको वान-अन-वान वार्ताका क्रममा आफूले भारत र पाकिस्तानबीचको ७० वर्ष लामो काश्मीर मामिलामा मध्यस्थता गर्नसक्ने चाहना व्यक्त गरेका थिए । तर, उक्त प्रस्तावको भारतले विरोध गरेको थियो ।
यसअघि राष्ट्रपति ट्रम्पले आइतबार अमेरिकाको टेक्सासको ह्युस्टनमा आयोजित ‘हाउडी मोदी’ कार्यक्रममा भारतीय प्रधानमन्त्री नरेन्द्र मोदीसँग भेट गरेका थिए । मोदी र ट्रम्पले स्थानीय एनआरजी स्टेडियममा गएर भारतीय र अमेरिकी समुदायलाई सम्बोधन गरेका थिए ।
पछिल्लो समय अगस्ट ५ मा भारत सरकारले काश्मीरलाई दिएको संविधानमा रहेको विशेषाधिकार धारा ३७० खारेज गरेपछि पाकिस्तान र भारतबीको सम्बन्ध थप विवादित बनेको हो । हाल काश्मीर क्षेत्रमा व्यापक सेना परिचालन गरिनुका साथै केही नेताहरुलाई नजरबन्दमा राखिएको छ । त्यसैगरी सञ्चारसाधनबाट समेत बञ्चित गरिएको छ ।
काश्मीरी जनताको दूतको रुपमा आफू संयुक्त राष्ट्रसंघको महासभामा सहभागी हुने बताएका पाकिस्तानी प्रधानमन्त्री इमरान खान पनि साताव्यापी भ्रमणका क्रममा दोस्रो दिन राष्ट्रपति ट्रम्पसँग भेट गर्न लागेका हुन् । त्यसैगरी महासभामा भाग लिन अमेरिका पुगेका भारतीय प्रधानमन्त्री मोदी पनि अहिले सप्ताहव्यापी अमेरिका भ्रमणमा छन् ।
डन