नयाँ दिल्ली । आन्ध्र प्रदेशको पूर्वी गोदावरी जिल्लामा डुंगा दुर्घटनामा कम्तिमा ११ जनाको मृत्यु भएको छ । राज्यको आपदा प्रवन्धन विभागले जनाए अनुसार डुबेको डुंगामा जम्मा ६१ जना मानिस सवार थिए । तीमध्ये अधिकांश त्यहाँ घुमफिरको लागि गएका आन्तरिक पर्यटक थिए ।
पूर्वी गोदावरी जिल्लाको देवीपट्टनम मंडलको कच्चालुरु गाउँमा यो दुर्घटना आइतबार अपराह्न भएको थियो । डुंगामा रहेकामा ५० जना पर्यटक र अन्य स्टाफ थिए । त्यहाँ गएका अधिकांश मानिस गोदावरी नदीको छेऊमा रहेको पापीकोंडालु पहाडमा घुम्न गएका थिए । डुंगामा चढ्दा लाइफ ज्याकेट लाउने २० जना चाहिँ स्थानीय बासिन्दाको सहयोगमा किनारामा लगिएका थिए ।
प्रदेशका मुख्यमन्त्री वाइएस जगन मोहन रेड्डीले प्रभावितका परिवारलाई १० लाख रुपैयाँ दिने घोषणा गरेका छन् । तेलगंनाको बारंगल जिल्लाबाट गएका एक युवकले उनको साथ गएका १४ मध्ये ९ जना अझै बेपत्ता रहेको जनाएका छन् । (बीबीसी)
