विराटनगर । आरोहण–गुरुकुल विराटनगरको आयोजनामा जारी विद्यालय नाटक महोत्सवमा शनिबार ‘चण्डालिका एक अनन्त प्रेम कहानी’ मञ्चन भएको छ । 

श्री श्री रविशंकर विद्या मन्दिर विराटनगरले महोत्सवको नवौँ दिनमा हाटखोलास्थित सुशीला कोइराला नाटकघरमा नाटक मंचन गरेको हो । प्रसिद्ध साहित्यकार रविन्द्रनाथ टैगोरद्वारा लिखित नाटक स्कुल शिक्षिका सीमा अग्रवालले निर्देशन गरेकी हुन । 

नाटकमा अभिनय गर्ने कलाकारहरुलाई प्रदेश १ का प्रदेशसभा सदस्य सावित्रा रेग्मीले खादा ओडाएर सम्मान गरिन । आयोजक संस्थाका अध्यक्ष भैरव क्षेत्रीले मायाको चिनो प्रदान गरे । आरोहण–गुरुकुल विराटनगरको आयोजनामा भाद्र २० गतेदेखि विद्यालय नाटक महोत्सव आज आइतबार समापन हुँदैछ । 

आयोजकको म नैतिक नाटक मञ्चन गरी सुरु भएको महोत्सवमा आइतबार समेत गरी विभिन्न ९ विद्यालयले आ–आफ्ना नाटक मञ्चन गर्दैछन् । 

महोत्सवमा आइतबार रंगेली नगरपालिकाको रञ्जनी एकेडेमिक ई. टिचिङ स्कुलले “परिवेश” मञ्चन गर्नेछ । विराटनगर महानगरपालिकाको संरक्षण र प्रवद्र्धनमा सुरु भएको नाटक महोत्सवमा अपरान्ह ४ बजे नाटक मञ्चन हुनेछ । नाटक महोत्सवमा सांग्रिला बुक्स र वाईवाई चाउचाउले सहयोग गरेका छन् ।