काठमाडौं । संसदको अन्तर्राष्ट्रिय सम्बन्ध समितिको आइतबारको बैठकमा सञ्चारकर्मीलाई प्रवेशमा रोक लगाइएको छ । बैठकमा नेपाल वायुसेवा निगमको वाइडबडी जहाज खरिद उपसमितिका सम्बन्धमा छलफल गर्ने कार्यसूची थियो ।
सिंहदरबारस्थित समितिको कार्यालयमा बैठक शुरु हुनुअघि नै ‘समितिको निर्णय’ भन्दै सञ्चारकर्मीलाई प्रवेशमा रोक लगाइएको थियो । समिति सभापतिको रुलिङ भएमा सञ्चारकर्मीहरुलाई बैठकमा नराख्ने अधिकार भने समितिसँग रहन्छ । तर, यसअघि अन्तर्राष्ट्रिय सम्बन्ध समितिको बैठकमा सञ्चारकर्मीहरुले प्रवेश पाउने गरेका थिए ।
बहुचर्चित वाइडबडी घोटाला प्रकरणको विषयमा हुने छलफलमा भने उनीहरुलाई बाहिरै राखिएको हो । लेखा समितिले वाइडबडी खरिद प्रकरणमा भ्रष्टाचार भएको प्रतिवेदनसहित त्यसमा संलग्नलाई कारबाही गर्न गत पुस २३ गते सरकार र अख्तियार दुरुपयोग अनुसनधान आयोगलाई निर्देशन दिएको थियो ।
समितिले निगमका दुईवटा वाइडबडी खरिद गर्दा ४ अर्ब ३५ करोड अनियमितता भएको प्रतिवेदन सार्वजनिक गरेको थियो ।
फाइल तस्बिर
