विदेश
काठमाडौं । स्वतन्त्रता पक्षधर नेसनलिस्ट पार्टीका एक जना उमेदवारलाई अर्को महिना हुने विधान परिषद्को निर्वाचनमा भाग लिन अयोग्य घोषित गरिएको छ ।
हङकङ नेसनलिस्ट पार्टीका उमेदवार चान हो तिनलाई त्यहाँको निर्वाचन आयोगले शनिबार इमेल पठाएर उनको उमेदवारी खारेज गरिएको जानकारी दीएको रोयटरले जनाएको छ ।
चानले हङकङ चीनको अभिन्न अंग हो भन्ने कागजमा दस्तखत गर्न इन्कार गरेका थिए । चानको पार्टीले यसलाई पुष्टि गर्दै आफ्नो पार्टी लोकतान्त्रिक निर्वाचनमा भाग लिन नपाउने पहिलो पार्टी भएको फेसबुकमा उल्लेख गरेको छ । चानलाई अयोग्य ठहर गर्ने निर्णयमा सरकारको सहमति भएको हङकङ सरकारले पनि जनाएको छ ।
निर्वाचनमा भाग लिनका लागि हङकङ चीनको अभिन्न अंग भएको स्वीकार गर्नुपर्ने नियम यही वर्ष लागु गरिएको र यसभन्दा पहिले हङकङको कानुन मान्ने घोषणामात्र गर्नुपर्ने व्यवस्था भएको रोयटरको समाचारमा जनाइएको छ ।
सन् १९९७ मा बेलायतले चीनलाई हङकङ फिर्ता गर्दा 'एक देश : दुई व्यवस्था' को सिद्धान्तअनुसार हङकङमा लोकतान्त्रिक शासन पद्धति कायम हुने सम्झौता भएको थियो ।
चानको जस्तै स्वतन्त्रता पक्षधर अरू उमेदवारको पनि दर्खास्त खारेज हुनसक्ने सन्देह गरिएको छ ।
प्रकाशित मिति: आइतबार, साउन १६, २०७३ १०:५२
प्रतिक्रिया दिनुहोस्