काठमाडौं । परोपकारी क्षेत्रमा क्रियाशील संस्था हेल्प नेपाल नेटवर्कले आफ्नो स्थापनाको २०औं वर्ष मनाउने तयारी गरिरहेको छ । हेल्प नेपाल नेटवर्कका अनुसार आउँदो अक्टोबर महिनामा काठमाडौंमा यस संस्थाको २०औं वार्षिकोत्सव मनाइने भएको छ ।
सोही सन्दर्भमा हेल्प नेपाल नेटवर्कको अस्ट्रेलिया शाखाले संस्थाको २०औँ वार्षिकोत्सव सिड्नीमा मनाएको छ । गत शनिबार सिड्नीमा साउथवेल्सका बहुसांस्कृतिक राज्य मन्त्री जोन सिदोतीको प्रमुख आतिथ्यमा वार्षिकोत्सव कार्यक्रम सम्पन्न भएको थियो ।
सो कार्यक्रममा हेल्प नेपालले धुलिखेलमा सञ्चालन गर्दै आएको बालिकाहरूको आश्रयस्थल बालगृहमा ई–लाइब्रेरी व्यवस्थापनका लागि हेल्प नेपालको अस्ट्रेलिया शाखाले ५ हजार डलर प्रदान गरेको थियो । सोही अवसरमा दोलखामा निर्माणाधीन राजकुलेश्वर स्कूलका लागि हेल्प नेपाल अस्ट्रेलियाले १० देखि १५ हजार डलरसम्म सहयोग गर्ने वचन दिएको हेल्प नेपालका अध्यक्ष अरुणसिंह बस्नेतले बाह्रखरीलाई बताए ।
सोमबार बिहान बाह्रखरीसँग कुरा गर्दै अध्यक्ष बस्नेतले यो साता मेलवर्न र क्यानवेरामा पनि वार्षिकोत्सव कार्यक्रम हुने बताए । २० वर्षअघि सन् १९९९मा स्थापित हेल्प नेपालले शिक्षा, स्वास्थ्य तथा दैवी विपद्का बखत सहयोग गर्दै आएको छ ।
