काठमाडौं । भारतका विदेशमन्त्री एस जयशंकर नेपाल—भारत संयुक्त आयोगको बैठकमा सहभागी हुन पर्सि बुधबार काठमाडौं आउने भएका छन् । दुई दिनसम्म चल्ने सो बैठकमा नेपाली प्रतिनिधिमण्डलको नेतृत्व परराष्ट्रमन्त्री प्रदीप ज्ञवाली र भारतको प्रतिनिधित्व भारतीय विदेशमन्त्री जयशंकरले गर्ने परराष्ट्र मन्त्रालयद्वारा जारी वक्तव्यमा जनाइएको छ ।
संयुक्त आयोगको यो पाँचौ बैठक हो । बैठकले दुई पक्षीय मामिलाका सबैजसो विषयमा छलफल गर्ने बताइएको छ । कनेक्टिभिटी, आर्थिक साझेदारी, व्यापार, पारवहन, उर्जा, जलस्रोत, संस्कृति, शिक्षा र अन्य दुई पक्षीय विषयमा बैठकमा छलफल हुने बताइएको छ । आयोगको स्थापना सन् १९८७मा भएको हो । यसअघि चौथो बैठक सन् २०१६मा नयाँ दिल्लीमा भएको थियो ।
भारतीय विदेशमन्त्रीले नेपालमा रहँदा राष्ट्रपति विद्यादेवी भण्डारी र प्रधानमन्त्री केपी शर्मा ओलीसँगपनि शिष्टाचार भेट गर्ने कार्यक्रम रहेको छ । परराष्ट्रमन्त्री ज्ञवालीले भारतीय समकक्षी जयशंकरको सम्मानमा रात्रिभोजको समेत आयोजना गर्ने छन् । भारतका विदेशमन्त्री जयशंकर हालै उत्तरतर्फको छिमेकी चीनको समेत भ्रमण गरेर नेपाल आउन लागेका हुन् ।