एभिसी सेन्ट्रल जोन भलिबलको तयारी पूरा

एभिसी सेन्ट्रल जोन भलिबलको तयारी पूरा

काठमाडौं । एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिताको सम्पूर्ण तयारी पूरा भएको छ । नेपालमा आयोजना हुने प्रतियोगिताको सम्पूर्ण तयारी पूरा भएको नेपाल भलिबल संघले पत्रकार सम्मेलन गरेर जानकारी गराएको छ ।
नेपाल भलिबल महासंघका महासचिव जितेन्द्र बहादुर चन्दले प्रतियोगिताको सम्पूर्ण तयारी पूरा भैसकेको बताए । भदौ २ देखि भदौ ७ गतेसम्म हुने प्रतियोगिताका लागि अफगानिस्तान टोली नेपाल आइसकेको उनले बताए ।
प्रतियोगिताका सम्पूर्ण खेलहरु लगनखेलस्थित सैनिक शारीरिक तालिम तथा खेलकुद केन्द्रमा हुनेछन् । प्रतियोगिता हुनुअघि आयोजक नेपालले अफगानिस्तानसँग दुई वटा मैत्रीपूर्ण खेलहरु खेल्नेछ । दुबै खेल साउन ३० र ३१ गते हुने आयोजकले बताएको छ ।
एसियन भलिबल संघको संयोजनमा हुने प्रतियोगितामा नेपालसहित बंगलादेश, अफगानिस्तान, किर्गिस्तान, माल्दिभ्स, तुर्किमिनिस्तान र उज्वेकिस्तानसहित ७ टोलीले प्रतिस्पर्धा गर्नेछन् ।
प्रतियोगिताको खेल तालिका भने केही दिनपछि सार्वजनिक हुनेछ ।

प्रतिकृया दिनुहोस
ad