लण्डन । बेलायतको प्रधानमन्त्रीमा बोरिस जोन्सन चयन भएका छन् । मंगलबार मध्यान्ह सार्वजनिक भएको मतपरिणाम अनुसार कन्जरभेटिभ पार्टीका कार्यकर्ताले जोन्सनलाई बेलायतको प्रधानमन्त्रीमा निर्वाचित गरेका हुन् ।
पूर्वविदेश मन्त्रीसमेत रहेका जोन्सनले बहालवाला विदेशमन्त्री जेरेमी हन्टलाई पराजित गरेका हुन् । औपचारिक रुपमा प्रधानमन्त्रीको घोषणा कामचलाउ प्रधानमन्त्री टेरिजा मेले पदत्याग गरेलगत्तै भोलि बुधबार हुनेछ ।
एक लाख ६० हजार सांसदले गरेको मतदानमा जोन्सनले ९२ हजार १५३ मत ल्याएका छन् भने उनका प्रतिद्वन्दीले ४६ हजार ६५६ मत ल्याएका छन् ।
जोन्सन प्रधानमन्त्रीमा निर्वाचित भइसकेपछि टेरिजा मेले बधाई दिएकी छन् । उनले ब्रेक्जिट सम्झौताका विषयमा मिलेर काम गर्न र आफ्नो पूर्ण समर्थन रहेन बताएकी छन् ।
प्रधानमन्त्रीमा निर्वाचित भइसकेपछि जोन्सनले आफूसँग पराजित हन्ट र बाहिरिँदै गरेकी प्रधानमन्त्री मेलाई सम्मान व्यक्त गरेका छन् । उनले हन्टलाई 'फन्ट अफ एक्सलेन्ट आइडिया' (उत्कृष्ट विचारक) भएको बताएका छन् । त्यसैगरी मेलाई यति लामो समयसम्म राष्ट्रको सेवा गरेको भन्दै सम्मान व्यक्त गरेका हुन् ।
संसद भवनबाहिर विरोध, शिक्षामन्त्रीको राजिनामा
प्रधानमन्त्रीमा जोन्सन निर्वाचित भएको भन्दै संसद भवन अगाडि विरोध प्रदर्शन गरिएको छ । उनीहरुले वेस्टमिन्सटरअघि नो टु रेसिज्म (जातियता अस्वीकार) नो टु बोरिस जोन्सन (बोरिस जोन्सन अस्वीकार) लेखिएका प्लाकार्डसहित विरोध गरिरहेका छन् ।
त्यसैगरी प्रधानमन्त्री बोरिस जोन्सन भएको भन्दै शिक्षा विभाग मन्त्रीले राजिनामा दिएकी हुन् । उनले जोन्सनको क्याबिनेटमा नबस्ने भन्दै जोहन्सनकै अघि राजिनामा बुझाएकी हुन् ।
जोहन्सन निर्वाचित हुनअघि नै मन्त्री एन्ने मिल्टनले राजीनामा दिएकी हुन् ।
