काठमाडौं । चीनको छेन्दुङ नगरपालिकाले काठमाडौं महानगरपालिकालाई दुईवटा ब्रुमर उपलब्ध गराएको छ । काठमाडौं उपत्यकाका सडकको धुलो उठाएर सफा बनाउन छेन्दुङले ब्रुमर उपलब्ध गराएको हो । यसअघि महानगरसँग ५ वटा ब्रुमर छन् ।
छेङ्दुले महानगरलाई दिएका ब्रुमर युरो ५ मापदण्डका हुन् । महानगरको मेकानिकल शाखाका प्रमुख प्रमोद डंगोलका अनुसार ८.६ मिटर लम्बाइ र ३.५ मिटर चौडाइका ब्रुमरमा २ वटा इञ्जिन छन् । गाडी सञ्चालन गर्ने इञ्जिनको क्षमता १५५ किलोवाट छ भने ब्रुमर चलाउने इञ्जिनको क्षमता ११८ किलोवाट छ । १५.८ टन तौल भएका ब्रुमर डिजेलले चल्छन् । धुलो र पात पतिंगर संकलन गर्न प्रयोग गर्न सकिने हरेक ब्रुमरमा ७ घनमिटर धुलो संकलन गर्ने र ९ घनमिटर पानी बोक्ने क्षमता छ ।
सडक सफाइ गर्दा पहिले पानी छर्केर धुलो नउड्ने बनाएपछि धुलो तथा पतिङ्गर तान्छ । ९८ किलोमिटर प्रतिघण्टा गति भएको यसले सडकको अवस्था हेरी प्रतिघण्टा ३ किलोमिटरदेखि २० किलोमिटरसम्म सडक सफा गर्न सक्छ । भन्सारबाहेक यी २ वटा ब्रुमरको मूल्य २ करोड २७ लाख ३७२ रुपैयाँ हो ।