काठमाडौं । बलिउड मुभी ‘भारत’लाई बुधबार रिलिज गर्न दिएको ‘स्टे अर्डर’ अदालतले खारेज गरिदिएको छ । जेठ २० अदालतले दिएको ‘स्टे अर्डर’ शुक्रबार अदालतले खारेज गरिदिएको हो ।
चलचित्र विकास बोर्डले शुक्रबार अगाडि कुनै पनि भाषाका विदेशी चलचित्र रिलिज हुन नदिने अडान लिएपछि काठमाडौं जिल्ला अदालतमा मुद्दा दायर भएको थियो । वितरक कम्पनीले दायर गरेको मुद्दामा अदालतले स्वतन्त्र व्यवसायमा हस्तक्षेप नगर्न बोर्डलाई ‘स्टे अर्डर’ दिएको थियो ।
अदालतको ‘स्टे अर्डर’सँगै सलमान खान स्टारर चलचित्र ‘भारत’ इदको अवसर पारेर भारतमा रिलिज भएकै दिन नेपालमा पनि रिलिज भएको थियो ।
विकास बोर्डले अदालतलाई स्पष्टिकरण पठाएपछि अदालतले स्टे अर्डर खारेज गरेको हो । चलचित्र विकास बोर्डका अध्यक्ष केशव भट्टराईले भने, “मैले त्यही दिन भनेको थिएँ । हाम्रो स्पष्किरण पछि फैसला हाम्रो पक्षमा आउँछ । मैले भनेजस्तै भयो । ‘भारत’ त बुधबार रिलिज भयो । अब आउँदा दिनमा भने यो अवस्था रहँदैन ।”
अध्यक्ष भट्टराई जुनसुकै चलचित्र भएपनि शुक्रबार मात्रै रिलिज गर्नुपर्ने अडान राख्दै आएका छन् । “चलचित्रकर्मी र हल सञ्चालक पनि मैले पीडित भएको पाएको छु । साथीहरु कुन कानुनले रोक्न मिल्छ भन्ने प्रश्न गर्दै आउनु भएको छ,” भट्टराईले बाह्रखरीसँग भने, “अब कानुन बनाएर अगाडि बढ्छु । आउँदो आर्थिक वर्षबाट सबै पक्षलाई व्यबस्थित गर्दै जाने हो ।”
नेपाली चलचित्रको व्यापारमा असर गर्ने भन्दै भट्टराईले शुक्रबार अगाडि विदेशी भाषाका चलचित्र रिलिज नगर्ने अडान राखेका थिए । सोही कारण त्यसअघि बलिउड मुभी कलंक नेपालमा रिलिज हुन सकेको थिएन ।
‘भारत’ बुधबार नै रिलिज गर्न अदालतको आदेश, कानुनी परामर्श लिएर अगाडि बढ्छौं : बोर्ड
