काठमाडौं । प्रमुख प्रतिपक्षी दल नेपाली कांग्रेसकी सांसद डा. डिला संग्रौलाले योगदानमा आधारित सामाजिक सुरक्षाको कार्यान्वयनको अवस्थाका बारेमा जानकारी माग गरेकी छिन् । बुधबार प्रतिनिधिसभा बैठकको शून्य समयमा बोल्दै सांसद संग्रौलाले योगदानमा आधारित सामाजिक सुरक्षाको कार्यान्वयनको अवस्थाका बारेमा सरकारसँग जानकारी मागेकी हुन् ।
‘‘योगदानमा आधारित सामाजिक सुरक्षाको कार्यान्वयनको अवस्था के छ ? कार्यान्वयनको क्रममा रहेका सामाजिक सुरक्षा योजनाका लागि रोजगारदाता सूचीकरण र श्रमिकहरुको सूचीकरण एक प्रतिशत पनि हुन सकिरहेको छैन,’’ उनले भनिन्, ‘‘यो अवस्थामा श्रमिकहरुले विगतमा पाइरहेको सुरक्षा योजना पनि नपाउने र नयाँ योजनामा पनि जाने नसक्ने अवस्थाले थप जटिलता सृजना भएको छ । यस विषयमा सरकारको ठोस कार्यक्रम खोइ ?’’
सांसद संग्रौलाले सुरक्षा योजनाले केवल संगठित योजनालाई समेटे पनि सुरक्षा योजनाको छाताभित्र नरहेका अनौपचारिक क्षेत्रका श्रमिकहरुका लागि सरकार के गर्दैछ भनेर पनि प्रश्न गरिन् । वैदेशिक रोजगारमा रहेका श्रमिकहरुलाई मतदानको अधिकार दिलाउने सन्दर्भमा सर्वोच्च अदालतले श्रमिकको कार्यस्थलबाट मतदान गर्न पाउनु पर्दछ भन्ने विषयप्रति सरकार मौन बसेको प्रति उनले आपत्ति जनाइन् ।
संग्रौलाले सरकारले लागू गरेको न्यूनतम ज्याला निजी क्षेत्रका विद्यालय, नर्सिङहोम लगायत थुप्रै कलकारखाना र उद्योगहरुमा लागू नभएको अवस्था रहेको भन्दै कार्यान्वयनको लागि सरकारले गरिरहेको अनुगमनका बारेमा पनि प्रश्न उठाएकी छिन् ।
