काठमाडौं । ब्रुमरले सडक सफा गरे पनि काठमाडौंका अधिकांश सडकमा धुलोको समस्या हट्न सकेको छैन । काठमाडौं महानगरपालिकाले सडकमा रहेको धुलो सफा गर्नका लागि पाँचवटा ब्रुमर सञ्चालन गरिरहेको छ ।

ब्रुमर सञ्चालन भए पनि सडकमा धुलोको मात्रा कम भएको छैन । महानगरपालिकाका मेयर विद्यासुन्दर शाक्यले ०७५ चैत १२ गते इटालीबाट ल्याएका ५ वटा ब्रुमरको औपचारिक उद्घाटन गरेका थिए । ती ब्रुमरहरु अहिले काठमाडौंका विभिन्न पाँचवटा रुटमा राति ८ देखि बिहान ३ बजेसम्म सञ्चालन भइरहेको महानगरपालिका वातावरण विभाग प्रमुख हरि श्रेष्ठले बताए ।

“पाँच वटा रुटमा ब्रुमर सञ्चालन गरिरहेका छौं । एक रातमा १७ टन धुलो संकलन गरिरहेका छौं,” प्रमुख श्रेष्ठले बाह्रखरीलाई जानकारी दिए । 

हरेक राति चल्ने ब्रुमरले प्रति ब्रुमर ८० लिटर डिजेल खर्च हुन्छ । यसरी पाँचवटा ब्रुमरले चार सय लिटर डजेल खर्च हुने गरेको प्रमुख श्रेष्ठले जानकारी दिए । तर, डिजेल, चालक तथा सहयोगीमा हुने खर्च बराबरको उपयोगी भने ब्रुमर हुन सकेका छैनन् । ब्रुमर चले पनि न त धुलो हटेको छ न राजधानीका जनताले धुलोमुक्त हावा स्वास फेर्न पाएका छन् । 

किन हट्दैन धुलो ?

ब्रुमरमा रहेको ब्रसले हाइड्रोलिक प्रेसरको माध्यमले सुख्खा धुलो तानेर ट्याङ्कीमा संकलन गर्ने हो । चैतदेखि नै काठमाडौंको मौसम बदली भएर प्राय: वर्षा भइरहेको छ । वर्षाका कारण सडकमा जम्मा भएको पानी ब्रुमरको ब्रसले तान्न सके पनि सडकमा जमेको हिलो ब्रुमरको ब्रसले तानेर संकलन गर्न सक्दैन । वर्षा रोकिएर घाम लागेपछि त्यही हिलो धुलोमा परिणत हुन्छ ।

यसकारण महानगरपालिकाले ब्रुमर प्रयोग गरेर सडक सफा गरे पनि सडकबाट उड्ने धुलो नियन्त्रण हुन नसकेको हो । यस्तै विकास निर्माणका नाममा जथाभावी सडक खन्ने तर त्यसलाई तत्कालै पुरानै अवस्थामा नफर्काउँदा सडक नै धुलो उत्पादनको प्रमुख स्रोत बनिरहेका छन् । 

विकास निर्माणमा काम गर्ने सरकारी निकायकै यस्तो लापरबाहीका कारण सडकबाट उडेको धुलोको असर सर्वसाधारणले भोग्नु परिरहेको छ । सडकबाट उडेको धुलोको चरम मर्कामा बालबच्चा र वृद्धवृद्धा पर्ने गरेका छन् ।संघीयताको कार्यान्वयनसँगै ३ वटै तहलाई सरकारले सडक मर्मत सम्भारको जिम्मा दिए पनि सडक खन्न हानाथाप गर्ने तर मर्मत, सम्भारमा ३ वटै निकायले हानाथाप गर्दा सडकबाट उड्ने धुलोको मर्का सर्वसाधारणले खप्नु परेको हो । 

यसरी खनिएका सडक पानी पर्दा हिलाम्मे हुन्छन् । तिनै सडकमा गुड्ने सवारी साधनका टायरमा टाँसिएको हिलो नखनिएका सग्ला सडकसम्म आइपुग्छ । खनिएका सडक पूर्णरुपमा कालोपत्रे नभई अहिलेकै अवस्थामा जति ब्रुमर लगाए पनि सडकको धुलो नहट्ने दाबी गर्छन् पूर्वाधार विज्ञ सूर्यराज आचार्य ।

“पुतलीसडक सफा राख्नु छ भने पहिला गोकर्ण, जोरपाटीतिरको सडक कालोपत्रे गर्नुपर्छ । त्यहीँ हिलो टाँसिएका गाडीका चक्काले काठमाडौंका अन्य क्षेत्रमा हिलो पुर्‍याउने गरेका छन्,” आचार्यले बाह्रखरीसँग भने ।