काठमाडौं । एसीसी यू–१६ पूर्वी क्षेत्रिय क्रिकेट प्रतियोगितामा नेपाली टोलीले जित निकालेको छ । थाइल्यान्डमा जारी प्रतियोगिताको पहिलो खेलमा नेपालले सुखद सुरुआत गरेको हो । शनिबार भएको खेलमा नेपालले म्यानमारलाई ७ विकेटले पराजित गर्दै प्रतियोगितामा सुखद सुरुआत गरेको छ ।
टस जितेर पहिलो ब्याटिङ गरेको म्यानमारले १३ ओभर २ बलमा अलआउट हुँदै ५८ रनमा समेटिएको थियो । म्यानमारले दिएको ५९ रनको सामान्य लक्ष्य नेपालले ८ ओभर १ बलमा मात्र ३ विकेट गुमाएर पूरा गरेको थियो ।
नेपालको जितमा अर्जुन कुमालले सर्वाधिक २३ रन बनाए । उनले अविजित रहँदै यो योगफल तयार पारेका हुन् । यस्तै सुवास ऐरले ११ रन बनाउन सफल भए । बलिङतर्फ म्यानमारका काउङ क्याले २ विकेट लिन सफल भए ।
यसअघि म्यानमारका लागि काउङ क्याले सर्वाधिक १९ तथा क्रिस्टोफरले ११ रन बनाउन सफल भए । उनी बाहेका म्यानमारका अन्य ब्याट्सम्यानले दोहोरो अंक जोड्ने सकेनन् । बलिङतर्फ नेपालका कप्तान विशाल बिक्रम केसीले ४ विकेट लिए । जितसँगै समूह ‘ए’ को नेपालले २ अंक जोडेको छ । नेपाल साविक विजेता पनि हो ।
