काठमाडौं । चालू आर्थिक वर्षको आठ महिनामा अघिल्लो आर्थिक वर्षको यही अवधिको तुलनामा विप्रेषण आप्रवाह एक चौथाइले बढेको छ । राष्ट्र बैंकको तथ्यांकअनुसार नेपाल भित्रिएको रेमिट्यान्स २३ दशमलव ४ प्रतिशतले बढेर ५ खर्ब ८२ अर्ब १९ करोड रुपैयाँ पुगेको हो ।

अघिल्लो वर्षको सोही अवधिमा विप्रेषण आप्रवाह मात्र ४ दशमलव ९ प्रतिशतले बढेको थियो । अमेरिकी डलरमा विप्रेषण आप्रवाह ११ दशमलव ६ प्रतिशतले वृद्धि भएको छ । अघिल्लो वर्ष यस्तो आप्रवाह ९.५ प्रतिशतले बढेको थियो । समीक्षा अवधिमा खुद ट्रान्सफर आय २२ दशमलव ९ प्रतिशतले वृद्धि भई ६ खर्ब  ६२ अर्ब ७० करोड पुगेको छ । अघिल्लो वर्षको सोही अवधिमा यस्तो आय ०.७ प्रतिशतले घटेको थियो ।

राष्ट्र बैंकका अनुसार अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) का आधारमा वैदेशिक रोजगारीमा जाने नेपालीको संख्या समीक्षा अवधिमा ३८ दशमलव ३ प्रतिशतले घटेको छ । अघिल्लो वर्षको सोही अवधिमा यस्तो संख्या ५.४ प्रतिशतले घटेको थियो ।

साथै, पुनः श्रम स्वीकृतिका आधारमा वैदेशिक रोजगारीमा जाने नेपालीको संख्या समीक्षा अवधिमा ४ दशमलव ६ प्रतिशतले बढेको छ । अघिल्लो वर्षको सोही अवधिमा यस्तो संख्या १ दशमलव ३ प्रतिशतले घटेको थियो ।