काठमाडौं । अभिनेता मुकुन भुषाल अब म्युजिक भिडियोमा देखिने भएका छन् । चलचित्र ‘बुलबुल’बाट अभिनय यात्रा सुरु गरेका मुकुन पहिलोपटक म्युजिक भिडियोमा देखिन लागेका हुन् ।
गणेश सेन्चुरीको गीतमा आफूले अभिनय गरेको मुकुन बताउँछन् । सुरविना कार्की उनको अपोजिटमा छिन् । “बुलबुल रिलिज भएपछि म्युजिक भिडियोमा खेल्ने हो भनेर धेरैले सोध्नुहुन्छ । तर यो गीतमा मोडलिङ नभएर प्ले भएकाले अभिनय गरेको हुँ,” उनले बाह्रखरीसँग भने, “म्युजिक भिडियो मात्रै भएको भए सायद म खेल्दिन थिएँ होला ।”
विनोद पौडेलको लेखन तथा निर्देशन रहेको चलचित्र ‘बुलबुल’मा अभिनय गरेपछि मुकुन पहिलो चलचित्रबाटै दर्शकमाझ नोटिस भएका थिए । मुकुनले ‘बुलबुल’मा चोपेन्द्रको भूमिका निभाएका छन् । उनको अभिनयको चौतर्फी प्रशंसा भएको थियो ।