बीबीसी । भारतीय व्यापारी अनिल अम्बानीको एक कम्पनीलाई फ्रान्स सरकारले करिब ११०० करोड कर छुट दिएको चर्चित फ्रान्सेली पत्रिका ला मोन्दले आफ्नो रिपोर्टमा दाबी गरेको छ । अम्बानीको कम्पनीले भने यो दाबीलाई अस्वीकार गर्दै कम्पनीले यस्तोखाले कुनै फाइदा वा छुट नलिएको जिकिर गरेको छ । रिलायन्स कम्युनिकेसनले करसम्बन्धी मुद्दा फ्रान्समा लागू कानुनमा टेकेरै सुल्झाएको बताएको छ ।
ला मोन्दका अनुसार रिलायन्स फ्ल्याग एटलान्टिक फ्रान्स (आरएफएएफ) नामको कम्पनीबाट असुलउपर गर्नुपर्ने १४ करोड ३७ लाख युरो (करिब ११०० करोड भारु) कर असुली रद्द गरिएको थियो । रिलायन्सले कर छुटको राहत पाउनुभन्दा झण्डै एक महिनाअघि भारतीय प्रधानमन्त्री नरेन्द्र मोदीले फ्रान्सेली कम्पनी दसो एभिएसनसँग ३६ रफाल लडाकु विमान खरिद गर्ने घोषणा गरेका थिए । आरएफएएफको स्वामित्व अनिल अम्बानीको रिलायन्स कम्युनिकेसनसँग रहेको र त्यो फ्रान्सेली कम्पनी भएको पनि बताइएको छ ।
यतिखेर भारतमा लोकसभा निर्वाचन चलिरहेको छ । विपक्षले रफाल कारोबारको गडबडीलाई लिएर सत्तापक्षमाथि प्रश्न उठाइरहेको छ । काङ्ग्रेस अध्यक्ष राहुल गान्धीले रफालमा प्रधानमन्त्री मोदीको संलग्नता रहेको र त्यसमा चरम भ्रष्टाचार भएको आरोप लगाउँदै आएका छन् ।
ला मोन्दको रिपोर्टबारे यसै अखबारका दक्षिण एसिया संवाददाता जुलियन बोसुले थुप्रै पटक ट्विट गरिसकेका छन् । उनले फ्रान्समा अम्बानीको एक टेलिकम कम्पनी दर्ता रहेको र त्यसको नाम रिलायन्स फ्ल्याग एटलान्टिक फ्रान्स रहेको बताएका छन् । उक्त रिपोर्ट तयार पार्न आफूलाई महिनौं लागेको पत्रकार बोसुले बताएका छन् । रिलायन्सले भने करसम्बन्धी कुनै पनि कुरामा विशेष छुट नलिएको र फ्रान्सको कानुनअनुसार नै काम भएको दाबी गरेको छ । बीबीसीबाट
