काठमाडौं । वर्ष २०७५ सकिन अब दुई दिन बाँकि छ । यो वर्ष नेपाली चलचित्र उद्योगका लागि फाप सिद्ध भएन । एकाध बाहेकका चलचित्रका लागि यो खुसीको वर्ष रहेन । कमेडी जानरामा बनेको दीपाश्री निरौलाको चलचित्र ‘छक्का पञ्जा-३’ ले बक्स अफिसमा राम्रो उपस्थिती जनायो । अन्य चलचित्रले खासै उत्साहजनक व्यापार गर्न सकेनन् । हाइप राम्रो बनाएका चलचित्रले पनि हलमा दर्शक तान्न सकेनन् ।
कमेडी ‘छक्का पञ्जा–३’ ले बक्स अफिसमा बम्पर ओपनिङसँगै लगातार दर्शक तान्दा लभ स्टोरी ‘नाईं नभन्नु ल–५’ले पनि राम्रै व्यापार गर्यो । दसैंको छेको पारेर रिलिज भएको अशोक शर्माको चलचित्र ‘जय भोले’ले मुस्किलले लगानी उठायो । खगेन्द्र लामिछानेको कथा र अभिनय रहेको यो चलचित्रले अपेक्षित व्यापार भने गर्न सकेन ।
‘रामकहानी’ ले नेपालभित्र र ओभरसिज मार्केटबाट मुस्किलले लगानी सुरक्षित गर्दा दीपेन्द्र के खनालको चलचित्र ‘चङ्गा चेट’ लगानी उठाउन भने सफल भयो । तर दीपेन्द्र के खनाल र खगेन्द्र लामिछाने दुबैले समीक्षकको गाली खाए ।
एकपछि अर्को हाइप बनाएका चलचित्र रिलिज भए पनि हलमा पुग्दा दशर्कको खडेरी लाग्यो । रिलिज भएको दिन शुक्रबार नै हलका सिट खाली भए । दिनेश राउतको चलचित्र ‘प्रसाद’ले भने लगानी सुरक्षित गर्यो ।
अधिकांश चलचित्रका निर्देशक तथा कलाकारले आफ्नो चलचित्रले दर्शकलाई हलसम्म तान्ने ल्याकत राख्ने दाबी गर्न छोडेनन् तर न उनीहरुको चलचित्रलाई दर्शकले पत्याए न त समीक्षकले राम्रो नै लेखे । एकपछि अर्को चलचित्र लाग्दै गए । तर अधिकांश चलचित्र लागेको र उत्रिएको दर्शकले पत्तै पाएनन् ।
यो वर्ष पनि विगत वर्षहरुमा झैँ निर्माता तथा निर्देशकहरु हल्लीखल्ली र दाबी गर्न भने छोडेनन् । व्यापारको उकालो लाग्दो ग्राफ देखाउने केक काट्न, हिट भएको भन्दै सिक्वेल निर्माणको घोषणा गर्न र अर्को चलचित्र घोषणा गर्न छोडेनन् । तर घोषणा गरिएका सिक्वेल बन्ने तरखरमा तत्काल देखिदैनन् । बरु सिक्वेल घोषणा गर्नेहरु अन्य चलचित्रमा जुटे ।
फागुन ३ ‘बुलबुल’ को दिन भन्दै फागुन ३ गते रिलिज भएको चलचित्र ‘बुलबुल’ले नेपाल र ओभरसिज बजार गरेर लगानी उठाउने अवस्था छ । नेपालबाट उत्रिसकेको चलचित्र अष्ट्रेलियामा छ । अष्ट्रेलियासँगै अन्य देशको राइट्सबाट लगानीको आधा रकम उठ्ने निश्चित भएपछि ‘बुलबुल’ले लगानी उठाउने भएको हो ।
‘इन्टु मिन्टु लण्डनमा’ र ‘कोहलपुर एक्सप्रेस,’ले पनि निर्माण लागत उठाए । बाँकी सबै चलचित्रको लगानी बालवामा पनि भयो । रिलिज पूर्व कमाएको हाइप बालुवाको घर सरह भयो ।
हाइप बनाए तर फल्प भए
भुवन केसीले फुटबलको विषयलाई लिएर आफूले पहिलो पटक चलचित्र बनाएको दाबी गर्दै ‘क्याप्टेन’ बनाए । अनमोल केसी मुख्य भू्मिकामा थिए । चलचित्रले सोचेभन्दा पनि राम्रो हाइप बनायो । तर यो चलचित्र नराम्रोसँग फल्प भयो । ‘कृ’को जती पनि व्यापार गरेन । समीक्षकको साथ नपाए पनि दर्शकको साथ पाउने गरेका अनमोलले ‘कृ’बाट गुमाएको साख ‘क्याप्टेन’बाट फर्काउलान् कि भन्ने अपेक्षा धेरैले गरेका थिए । तर, अपेक्षा गर्नेहरुलाई उनले निराश बनाए ।
अर्का चकलेटी हिरो प्रदीप खड्काका चलचित्रले पनि हाइप बनाए तर दर्शक कमाएनन् । ‘रोज’ र ‘लभ स्टेशन’ दुबै चलचित्रले हाइप त बनाए तर हलमा दर्शक उनीहरुका चलचित्र हेरिदिन गएनन् । यो वर्ष स्टारडमको चर्चा चर्कै चल्यो । यद्यपि हलमा स्टारडमको प्रभाव शून्य प्राय भयो ।
नयाँ स्टारडम मात्रै होइन पुरानो स्टारडमका चलचित्रलाई पनि दर्शकले पत्याएनन् । न रेखा थापाको ‘मालिका’ले दर्शक बटुल्यो न आर्यन सिग्देलको ‘कायरा’ माथि नै दर्शकले भरोसा गरे ।
रेखादेखि अनमोलसम्मका चलचित्रले दर्शक तान्न नसकेको यो वर्ष ‘पशुपतिप्रसाद’मार्फत आफूलाई प्रमाणित गरेका खगेन्द्र लामिछानेको ‘डण्डीबियो’लाई पनि दर्शकले मन पराइ दिएनन् ।
‘रोज’, ‘लभ स्टेशन’ र ‘कायरा’सँगै हाइप बनाए ‘हरि’, ‘गोपी’, ‘समरलभ’, ‘द म्यान फ्रम काठमाडौं’ र ‘रोमियो एन्ड मुना’ले पनि । तर यी चलचिलाई पनि दर्शकले मन पराएनन् । ‘साईंली’ले पनि हलमा अपेक्षित सफलता पाउन सकेन । भोली शुक्रबार राम्रो हाइप बनाएका चलचित्र ‘ए मेरो हजुर–३’ र ‘यात्रा’ रिलिज हुँदैछन् । भोलीका लागि रिलिज डेट लिएका चललचित्र प्रदर्शनमा आएपछि ०७५ मा रिलिज हुने चलचित्रको संख्या ९६ पुग्नेछ ।
पारिश्रमिक बढेको वर्ष
चलचित्र चलुन् या नचलुन् स्टारको बजार मूल्य अर्थात पारिश्रमिक भने घटेन । एउटै कलाकारले एउटै चलचित्रबाट ४० लाखसम्म पारिश्रमिक लिएको हल्ला चल्यो । अनमोल केसी र प्रदीप खड्काको पारिश्रमिकले बजार ततायो । उनीहरुसँगै अखबारदेखि डिजिटलका मिडियाका भित्तामा विपिन कार्की, साम्राज्ञी आरएल शाहसम्मको पारिश्रमिकले महत्व पायो । चलचित्रको कथामाभन्दा पनि पारिश्रमिकमा अस्वस्थ प्रतिस्पर्धा वर्ष भरी नै रह्यो ।
कथासँगै अभिनयमा पनि अब्बल रहने भनिएका खगेन्द्रले पनि कमाल देखाउन सकेनन् यो वर्ष । ‘डमरुको डण्डीबियो’ चलेन । ‘जय भोले’ अपेक्षित भएन । स्टारडमले दर्शक तान्न सकेनन् ।
तर अभिनयका पारङ्गत विपिन कार्कीले भने ‘हरि’बाट पनि अभिनयमा तारिफ बटुले भने उनको ‘प्रसाद’लाई दर्शकको साथ मिल्यो । ‘गोपी’मा भने उनको अभिनय खासै जमेन । ‘गोपी’बाट सुरक्षा पन्तले भने तारिफ बटुलिन् । ‘बुलबुल’बाट स्वस्तिमा खड्काले छुट्टै उचाई बनाइन् । यही चलचित्रबाट निर्देशक तथा लेखक विनोद पौडेलले राम्रो सम्भावना मात्रै देखाएनन् केही नयाँ र मौलिकपन दिन सक्छु भन्ने प्रमाणित पनि गरे ।
ठूला ब्यानर पर्व विदामा भिड्न छाडेनन् । त्यसको असर बक्स अफिसमा देखियो । अझै भिड्न बाँकी छ । ‘ए मेरो हजुर–३’ र ‘यात्रा’ । अर्थात सलिनमान बानियाँ र अनमोल केसी ।
यही वर्ष रेनेशा राई कोरियोग्राफरबाट निर्देशकमा फड्को मारिन् । उनले निर्देशन गरेको चलचित्र ‘इन्टु मिन्टु लण्डन’बाट धिरज मगरले सम्भावना देखाए ।
कमेडी नै रुचाइयो
पारिश्रमिकमा ४० लाखसम्म रस्साकस्सी गरे पनि दर्शकले भने कमेडीयन एक्टर एक्ट्रेसलाई पत्याए । दीपकराज गिरी, केदार घिमिरे, जितु नेपाललाई नै मन पराए । उनीहरुकै चलचित्र प्रतिक्षित बने । केदार घिमिरेको चौतर्फी प्रशंसा भयो । महिला निर्देशकका रुपमा आफूलाई अब्बल सावित गरिन् दीपाश्री निरौलाले ।
यही वर्ष साउन १ गतेदेखि चलचित्र विकास बोर्डले काठमाडौंका केही हलमा बक्स अफिस प्रणाली लागु गर्यो । तर बक्स अफिस लागु भए पनि त्यसको रिपोर्ट समयमै उपलब्ध हुन नसकेको, वितरक र विकास बोर्डको तथ्यांकमै फरक परेको विकास बोर्डले बताउँदै आएको छ ।
यो वर्ष निकै राम्रो टीआरपी र युट्युब स्क्रिनिङ उच्च रहेको सिङगिङ रियालिटी शो ‘नेपाल आइडल’ सिजन–२ लाई चलचित्र प्रचारको राम्रै माध्यम बनाइयोे । अहिले ‘नेपाल आइडल’ छैन । ‘मुन्द्रेको कमेडी क्लब’मा चलचित्रकर्मी केन्द्रित भएका छन् । प्रदर्शनको मिति नजिकिएका चलचित्रका निर्देशक तथा कलाकारले आफ्नो चलचित्रबारे कुरा राखिरहेका छन् ।
चलचित्रका गीतमा वर्षभरी नै लोकलय फ्लेबरमा राजनराज शिवाकोटीका गीत लोकप्रिय भए । सेन्टिमेन्टलतर्फ अर्जुन पोखरेलका गीत तथा संगीत रुचाइयो ।