वाशिङटन । अमेरिकाका पूर्वउपराष्ट्रपति जोइ बाइडेनलाई अहिलेसम्म चार जना महिलाले आफूहरुलाई अवाञ्छित ढंगले छोएको आरोप लगाएका छन् । 

उनी सन् २०२० को लागि डेमोक्रेटिक पार्टीका तर्फबाट राष्ट्रपतिको उमेदवार बन्ने चर्चा चलिरहेका बेलामा यसरी विवादमा आएका हुन् ।  न्यूयोर्क टाइम्सले प्रकाशित गरेको पछिल्लो समाचारअनुसार सन् २०१२ मा भएको एउटा घटनामा लेखक डीजे हिलको काँधमा पूर्वउपराष्ट्रपति बाइडेनले हात राखेको आरोप लगाइएको छ । त्यसपछि उनले तल्लो भागमा हात सारेको आरोप लगाइएको छ । मिनेपोलिजमा भएको सो घटनामा खासमा लेखक र उनका पति बाइडेनसँग फोटो खिचाउन जाँदा यस्तो घटना भएको हो । आफूले त्यतिबेला धेरै नै असहज महसुस गरेको उनले जनाएकी छन् । यसो गरेको प्रसंग आफ्ना पतिले पनि देखेको र उनले ठट्टा गर्ने गरेको हिलले जनाएकी छन् । 

अर्को आरोप कलेजकी एकजना पूर्वविद्यार्थीले लगाएकी छन् ।  केटलिन करुसो नामकी २२ वर्षीया ती युवतीले जनाएअनुसार कलेजमा एउटा कार्यक्रममा भाग लिन आएको बेलामा बाइडेनले उनको  तिघ्रामा हात राखेका थिए ।  लस भेगासको नेभाडा विश्वविद्यालयमा त्यो घटना भएको उनको दाबी छ । उनी सो समयमा १९ वर्षको भएको उनले जनाएकी छन् । 

उपराष्ट्रपति जस्तो मान्छेले त्यसो गर्लान् भनेर आफूले नसोचेको उनले बताएकी छन् । 

गएको सोमबार अमी लापोस नामकी पूर्वसहयोगीले बाइडेनले सन् २००९ मा दुवै हातले आफ्नो अनुहारमा छोएको र नाक रगडेको आरोप लगाएकी थिइन् । गएको हप्ता नेभाडाका राजनीतिज्ञ लुसी फ्लोरेजले सन् २०१४ को चुनावी अभियानका क्रममा बाइडेनले आफ्नो काँधमा समातेर कपाल सुँघ्नुका साथै उनको टाउकोको पछाडिको भागमा चुम्बन गरेको आरोप लगाएको फक्स न्युजले जनाएको छ ।

बाइडेनले भने सबै आरोपहरुको खण्डन गर्दै आएका छन् । उनी बाराक ओबामाको राष्ट्रपतिको कार्यकालमा सन् २००९ देखि २०१७ सम्म अमेरिकाको उपराष्ट्रपति रहेका थिए ।