इश्लामावाद । पाकिस्तानमा दुई हिन्दू किशोरीलाई अपहरण गरेर जबर्जस्ती धर्म परिवर्तन गराइएको भन्ने विषय नयाँ मोडमा पुगेको छ । यो घटनालाई लिएर पाकिस्तानका हिन्दू संगठनले सडकमा प्रदर्शन गर्नुका साथै दोषीमाथि कारवाहीको माग गरिरहेका छन् । तर त्यहाँको अदालतमा परेको मुद्दाको क्रममा सुनुवाई हुँदा दुवै किशोरीले स्वेच्छाले नै आफूहरुले धर्म परिवर्तन गरेको जनाएका छन् ।
घटना पाकिस्तानको सिन्ध प्रान्तको हो । बालिकाका पिताको भनाइ छ कि उनका दुवै छोरी नाबालिग छन् । उनीहरुलाई जबर्जस्ती मुसलमान बनाएर विवाह गराइयो ।
तर, किशोरीहरुले भने अदालतमा बयान दिने क्रममा आफूहरुले खुसीका साथ धर्म परिवर्तन गरेको बताएका छन् । उनीहरुले आफूहरुको उमेर २० र १८ वर्षको रहेको बताएका छन् । अदालतले दुवै किशोरीको बयान सुनेपछि उनीहरुलाई आवश्यक सुरक्षा दिन आदेश दिएको छ । त्यस्तै उनीहरुलाई इश्लामाबादबाट बाहिर जान नदिन पनि भनेको छ । अदालतले केही शक्ति पाकिस्तानको छवि खराब बनाउन लागिपरेको समेत जनाएको छ ।
अदालतले भनेको छ, ‘‘पाकिस्तानमा अल्पसंख्यकको अधिकार पूरै सुरक्षित छ ।’’ पाकिस्तानका प्रधानन्यायाधीश अतहर मिनअल्लाहले पाकिस्तानमा अन्य देशको तुलनामा अल्पसंख्यक समुदायको अधिकार राम्रो रहेको बताए ।
हालै सार्वजनिक गरिएको एक भिडियोमा भने दुवै किशोरी रोएको र निकाहपछि दुवैमाथि कुरपिट गरिएको समेत देखाइएको थियो । मिडियामा त्यसखालको खबर आएपछि भारतका विदेशमन्त्री सुष्मा स्वराजले पाकिस्तानमा रहेको आफ्नो देशको उच्चायोगसँग रिपोर्ट माग गरेकी थिइन् । यसलगत्तै पाकिस्तानका सूचना मन्त्री फब्बाद चौधरीले त्यसलाई पाकिस्तानको आन्तरिक मामिला भन्दै अल्पसंख्यक समुदायलाई अप्ठेरोमा पार्ने यो नरेन्द्र मोदीको भारत नभएको जवाफ दिएका थिए ।
(बीबीसी)