काठमाडौं । लामो समयको छलफलपछि नेपाली कांग्रेसले अनुशासन समिति गठन गरेको छ। पार्टी मुख्यालयमा सोमबार अबेरसम्म बसेको बैठककले भीष्मराज आङदम्बेको संयोजकत्वमा अनुशासन समिति गठन गरेको प्रवक्ता विश्‍वप्रकाश शर्माले जानकारी दिए। 

बैठकले नेपाली कांग्रेसको विधान, २०१७ (संशोधित र परिमार्जित) को धारा ३४ (७) अनुसार “केन्द्रीय अनुशासन समिति’ सर्वसम्मतिले गठन गरेको जनाइएको छ।

पाँच सदस्यी समितिको सदस्यमा देवेन्द्रराज कँडेल र किशोरसिंह राठौर चयन भएका छन्। बाँकी रहेका सदस्यमा वरिष्ठ नेता पौडेलले नाम उपलब्ध गराएपछि पदपूर्ति हुने स्रोतले जनाएको छ। 

समितिले गर्ने काम कारबाहीका विषयमा पनि सहमतीबाटै निर्णय लिइने सहमती भएको नेता अर्जुननरसिंह केसीले बाह्रखरीलाई बताए। 

केन्द्रीय कार्यसमितिको बैठक  मंगलबार दिउँसो २ बजे पार्टीको केन्द्रीय कार्यालयमा पुनः बस्ने जनाइएको छ।

सोमबारको बैठकमा केन्द्रीय सदस्यहरु- बालकृष्ण खाँण, रमेश रिजाल, फरमूल्लाह मंसुर, मानबहादुर विश्वकर्मा, भीष्मराज आङ्दम्वे, अजयकुमार चौरिसिया, शंकर भण्डारी, ईश्वरी न्यौपाने, मोहनबहादुर बस्नेत र बीरबहादुर बलायरले आ-आफ्नो धारणा राखेका थिए।