काठमाडौं । बुधबार दिउँसो ताप्लेजुङमा हेलिकोप्टर दुर्घटनामा परी मृत्यु भएका व्यवसायी आङ छिरिङ शेर्पाको अन्त्यष्टि आइतबार गरिने भएको छ । आइतबार टेकुमा अन्त्यष्टि गरिने आङ छिरिङ शेर्पाका दाइ लाक्पा सोनाम शेर्पाले जानकारी दिए ।
बुधबार दिउँसो पाथीभरा दर्शन गरेर फर्किने क्रममा नजिकैको तारेभीरमा हेलिकोप्टर दुर्घटना हुँदा पर्यटनमन्त्री रवीन्द्र अधिकारी, व्यवसायी आङछिरिङ शेर्पासहित सात जनाको मृत्यु भएको थियो । तेह्रथुमको चुहानडाँडामा बनाउन लागिएको प्रस्तावित विमानस्थलको सम्भाव्यता अध्ययन गर्न बुधबार बिहान पर्यटनमन्त्री अधिकारीसहित सातजना त्यसतर्फ प्रस्थान गरेका थिए ।
सोलुखुम्बुमा जन्मिएका शेर्पा सानैदेखि ट्रेकिङमा लागेका थिए । पछि दाजुभाइ मिलेर काठमाडौंमा ट्रेकिङ अफिस खोलेर व्यवसायमा हात हालेका थिए । आङछिरिङ शेर्पा अहिले यति एयरलाइन्सको प्रबन्ध निर्देशक थिए भने उनले विभिन्न होटल, ट्रेकिङ, ट्राभल एजेन्सीहरुमा लगानी गरेका छन् ।
सबै कम्पनीमा गरेर ३ हजार बढीले प्रत्यक्ष रोजगारी पाएका छन् ।