काठमाडौं । नायक अनमोल केसी फुटवल त हेर्थे तर उनलाई त्यसको अभ्यास थिएन । होस् पनि कसरी ? सानो छँदा होस्टल बसे । १८ वर्षको उमेरदेखि चलचित्र खेल्न थाले । फुर्सदमा पनि घरबाहिर निष्किन रुचाँउदैनन् उनी । फ्यान फलोइङको ओइरो । फुटवल खेल्ने वातावरण पनि भएन । 

भुवन केसीको होम प्रोडक्सनले चलचित्र बनाउने भयो । विषयबस्तु फुटबल । नाम ‘क्याप्टेन’ । हिरो अनमोल । हिरोभएपछि क्याप्टेन पनि उनै । पर्यो फसाद । कसरी अभ्यस्त हुने फुटवलको  बडील्याङ्वेजमा ? 

कोच चाहियो । स्क्रिनमा देखिने कोचले पुग्दैन थियो । फुटवल ग्राउन्डकै कोच चाहिन्थ्यो । अर्थात वास्तविक फुटवल प्रशिक्षक । 

भुवनको आफ्नै चलचित्र ‘क्याप्टेन’ । तारतम्य मिलाउने जिम्मा उनकै थियो । छोरो अनमोललाई फुटवल खेल सिकाउने कोच खोजे भुवनले, हरि खड्का । राष्ट्रिय फुटवल टोलीका पूर्व कप्तान तथा वर्तमान राष्ट्रिय महिला फुटवल टोलीका कोच थिए, हरि । 

अनमोललाई हरिले सिकाउन थाले फुटवलको भाषा । तीन महिनामा उनले फ्रि स्टाइल, ग्राउन्ड प्ले, पोस्चर, रनिङ ल्याङ्वेज सिके । हरिले अनमोललाई तीन महिना दिए । तीन महिनामा हरिले फुटवल एक्स्प्रेसन देखि कसरी बल ढोगेर राख्ने सम्म सिकाए ।

“फुटबल पृष्ठभूमी नभएकाले फुटवलको बडील्याङग्वेजसम्म उसलाई बुझाउनु पर्ने थियो । त्यो सिकाउनलाई सुरुका केही दिन गाह्रो भए पनि अनमोल काप्रति निकै डेडिकेटेड रहेछ, त्यसैले ऊ चाँडै क्याच गथ्र्यो,” हरिले बाह्रखरीसँग भने, “छोटो समयमा फुटवलको सिचवेसनअनुसार मैले उसलाई कोच गर्नुपर्ने थियो । तर मैलै दिएको सिचुवेसनमा ऊ चाँडै ढल्न सक्थ्यो । छोटो समयमा उसले धेरै सिक्यो ।” 

सुटिङमा अनमोलका केही तीता अनुभव भने छन् । झापाको चरम गर्मीमा छायांकनको समय थियो । फुटवलका लागि रनिङ चाहिन्थ्यो । त्यसका लागि उनले आफूलाई तयार गर्नुथियो । “उभिँदामात्रै पनि खलखली पसिना आउने झापाजस्तो गर्मी ठाउँमा सुटिङ थियो । सुटिङमा जानु एक महिना अगाडि मेरो खुट्टा फ्याक्चर भएको भयो । मैले फुटवल हान्ने खुट्टा लेफ्ट थियो तर मैले क्याप्टेनमा राइट लेगले बल हानेको छु,” अनमोल बाह्रखरीसँग भन्छन्, “घाम भर्खर आउँदा देखि घाम नजाँदासम्म म ग्राउन्डमा प्राक्टिस गर्थें ।” 

फुटवलमा ९० मिनेटको खेल हेरेका उनले सोचेका थिए, खेलौंला नि ! तर त्यती सहज कहाँ थियो र वास्तविकता ? अहिले अनमोल आफैँ भन्छन्, “खेलाडी ९० मिनेट ग्राउन्डमा खेल्छ । तर मैले दैनिक ७ देखि ८ घण्टा फुटवल खेल्नुपथ्र्यो ।”

फागुन १७ गते रिलिज हुने चलचित्र ‘क्याप्टेनमा अनमोल पहिलोपटक गरिब बाउको छोराको भूमिकामा छन् । पर्दामै भए पनि गरिब बाउको छोरो हुँदाको अनुभव अनमोलले पहिलोपटक भोगे ।