नयाँ दिल्ली । भारतले पाकिस्तान जाने तीनवटा नदीको पानी रोक्ने भएको छ । भारतका संघीय जलस्रोत मन्त्री नीतिन गडकरीले बिहीबार सो घोषणा गरेका हुन् । हालै ठूलो संख्यामा भारतीय सुरक्षाकर्मीलाई काश्मीरको पुलवामामा आतंककारीले हत्या गरेपछि दुई देशबीचको सम्बन्ध बिग्रँदै गएको छ ।
भारतले पाकिस्तानलाई आतंकवादी समूहलाई आश्रय दिएको आरोप लगाउँदै आएको छ । इन्दुज सम्झौताअनुसार भारतबाट पाकिस्तान जाने तीनवटा नदीको पानी यमुना नदीतर्फ फर्काउने मन्त्री गडकरीले घोषणा गरेका छन् । इन्दुज सम्झौतामा सन् १९६० को सेप्टेम्बर १९ का दिन भारतका तत्कालीन प्रधानमन्त्री जवाहरलाल नेहरु र पाकिस्तानका तत्कालीन राष्ट्रपति अयुब खानले कराँचीमा हस्ताक्षर गरेका थिए ।
सो सम्झौताले भारतको पूर्वी भागमा रहेका बीज, रवी र सतलज नदीलाई समेटेको छ । अहिले जलस्रोत मन्त्रीले यी तीन नदीलाई यमुनामा डाइभर्ट गरिने बिहीबार बताएको इकोनोमिक टाइम्सले जनाएको छ ।