काठमाडौं । धनगढी प्रिमिएर लिग क्रिकेटमा महेन्द्रनगर युनाइटेडले सिवाइसी अत्तरियामाथि ७ विकेटकोे जित निकालेको छ । जितसँगै प्लेअफ पुग्ने झिनो सम्भावना बनाएको महेन्द्रनगरले अन्य टोलीको नतिजामा समेत भर पर्नुपर्नेछ । 
फाप्ला क्रिकेट मैदानमा ५५ रनको विजय लक्ष्य महेन्द्रनगरले २ बल बाँकी छँदै पूरा गर्यो । महेन्द्रनगरको जितमा विदेशी खेलाडी अनन्दले १७ रन बनाउँदा आरीफ शेख १५ रन अविजित रहे । कुशल मल्ल ६ रनमा अविजित रहँदा मोहम्मद नाभिद ६ र कप्तान शरद भेषवाकर ५ रनमा पेभेलियन फर्किएका थिए । सिवाइसीका भिम सार्कीले २ तथा दिपेन्द्र रावतले १ विकेट लिए । 
यसअघि पहिला ब्याटिङ गरेको सिवाइसी अत्तरियाले निर्धारित ६ ओभरमा ५ विकेटको क्षतिमा ५४ रन बनाएको थियो । चिसो मैदानका कारण ६ ओभरमा खेलाइएको खेलमा सिवाइसीका लागि सन्नी पटेलले १९ रन बनाउँदा जयकिसन कोल्सावाल र कप्तान दिपेन्द्रसिह ऐरीले १०–१० रन बनाएका थिए । सन्दीप जोरा ४ रन बनाएर पेभेलियन फर्किदा भिम सार्की र रित गौतम ४–४ रनमा अविजित रहेका थिए । महेन्द्रनगरका अभिनास बोहरा र सागर ढकालले २–२ विकेट लिदाँ कप्तान शरद भेषवाकरको नाममा एक विकेट रह्यो ।