काठमाडौं । घरेलु लिगमा निराशजनक लय रहे पनि बोरुसिया डर्टमन्ड अहिले क्लबको इतिहासमै दोस्रोपटक च्याम्पियन्स लिगको विजेता बन्न एक खेलले मात्र पछि छ ।

एडिन टेर्जिकको टोलीले मंगलबार दोस्रो लेगमा पीएसजीलाई १–० ले हराउँदा उत्कृष्ट प्रदर्शन देखायो । डर्टमन्डले समग्रमा २–० को जितसहित फाइनल यात्रा निश्चित गरेको हो ।

पार्क डे प्रिन्सेसमा घरेलु टिमविरुद्ध निर्णायक गोल गरेका रक्षक म्याक ह्युमेल्सलाई पनि लाग्छ डर्टमन्डले सन् १९९७ पछि पहिलोपटक च्याम्पियन्स लिगको उपाधि जित्नेछ ।

“समूह चरणको दोस्रो खेलदेखि नै हामी सक्षम छौँ भन्ने महसुस भएको थियो । र, हामीले वेम्बलीमा नजित्नुपर्ने कुनै कारण देख्दैनौँ,” ३५ वर्षीय ह्युमेल्सले भने, “हामी खेलभन्दा माथिको दबाब र मैदानभन्दा माथिको वातावरण थेग्नका लागि तयार थियौँ । यो हाम्रो सफलताको सुत्र हो ।”

“मैले च्याम्पियन्स लिगमा निकै कम गोल गरेको छुँ । जम्मा पाँच मात्र । यो संख्यामा थप गर्ने समय अहिले बनेको छ ।”

सन् २०१३ को च्याम्पियन्स लिग फाइनलमा बायर्न म्युनिखसँग पराजित हुँदा ह्युमेल्स डर्टमन्डकै टिममा थिए । उक्त फाइनल पनि इंग्ल्यान्डको वेम्बली रंगशालामा नै भएको थियो ।

बल ६ पटक पोस्टमा लागेर फर्किएको भए पनि फ्रेन्च च्याम्पियन पीएसजीले पाहुना टिमको रक्षापंक्ति तोड्न नसक्दा ह्युमेल्स टिमका महत्त्वपूर्ण रक्षक थिए । 

“हामीले धेरै कुरा भोग्यौँ, तर हामीले कसरी खेल जित्यौँ भन्नेबारे भोलि कसैले सोध्ने छैन,” डर्टमन्डका फरवार्ड मार्को रुइसले भने । पछिल्लो १२ वर्षयता डर्टमन्डमा निरन्तर रहेका रुइसको अन्तिम खेल वेम्बनीमै हुन सक्नेछ ।

“पोस्टमा लागेको प्रहारले भोलिको दिनमा अर्थ राख्दैन । अर्थ राख्ने भनेको बोरुसिया डर्टमन्डले फेरि तय गरेको फाइनल यात्रा मात्रै हो । यस्तो हुन्छ भन्ने कसैले अनुमान गरेका थिएनन् । यो उत्कृष्ट अनुभव हो ।”

समूह चरणमा पनि डर्टमन्ड पीएसजी, एसी मिलान र न्युक्यासलसँगै कठिन समूहमा परेको थियो । तर, टेर्जिकको टोलीले समूह चरणमा शीर्ष स्थान हासिल ग¥यो ।

“ग्रुप अफ डेथमा बोरुसिया डर्टमन्डबारे कसैले कल्पना समेत गरेका थिएनन् । उनीहरू समूहकै सबैभन्दा कमजोर टिम थिए । तर, उनीहरूले केही ठूला जित निकाले,” इंग्ल्यान्डका पूर्वमिडफिल्डर ओविन हर्गेभ्सले भने, “डर्टमन्डले टिममा ठूला स्टार नभए पनि लय भेट्टाए । टेर्जिकले समस्याको समाधान खोज्नमा उत्कृष्ट काम गरेर देखाए ।”

स्कटल्यान्डका पूर्वस्ट्राइकर एली म्याकोइस्टले पनि डर्टमन्डको प्रदर्शन ‘रणनीतिक रूपमा उत्कृष्ट’ भएको बताए । “१८० मिनेटसम्म उनीहरूको प्रदर्शन उत्कृष्ट थियो । डर्टमन्डको टिम एक्यबद्ध थियो । उनीहरूलाई टिमले एक वा दुई वटामात्र मौका पाउँछ भन्ने थाहा थियो र दुई रक्षक उत्कृष्ट थिए ।”

सन् २०२२–२३ को सिजन घरेलु मैदानमा माइन्जसँग २–२ को बराबरीमा रोकिएपछि डर्टमन्ड बुन्डेसलिगाको उपाधिबाट विमुख भएको थियो । लिगको अन्तिम दिन डर्टमन्ड घरेलु मैदानमै रोकिँदा बायर्नले गोलआधारमा बुन्डेसलिगाको उपाधि जितेको थियो ।

टेर्जिक उक्त दुःखद क्षणपछि समर्थकलाई पुनः उत्साह दिन पाउँदा खुसी छन् । “म खुसी छु, किनकी अब हामी समर्थकलाई उक्त दुःखद क्षणको बदलामा केही उत्साह दिन पाउँदै छौँ । हामी हरेक खेलबाट विकसित हुँदै आयौँ र अहिले हामी सबैलाई आश्चर्यजनक नतिजा दिन सक्ने टिमको रुपमा उदाएका छौँ,” उनी थप्छन् ।

“पीएसभीसँगको पहिलो खेलअघि हामीले लन्डनसम्मको यात्रा कति छोटो हुन्छ भन्ने कुरा गरेका थियौँ । यो हाम्रो लागि गर्विलो क्षण हो र हाम्रो सपना अझै पूरा भइसकेको छैन ।”