काठमाडौं । नेपाल क्रिकेट संघ (क्यान)का सचिव पारस खड्काले आफ्नो चरित्र हत्या गर्नेलाई कानुनी दायरामा ल्याउने चेतावनी दिएका छन् ।

सामाजिक सञ्जालमा सन्दीप लामिछानेको मुद्दासँग जोडेर विभिन्न आरोपहरू लगाएको विषयमा खड्काले आफ्नो ध्यानाकर्षण भएको जनाएका हुन् ।

"पछिल्लो केही समययता सामाजिक सञ्जालमा मेरो नाम जोडेर चरित्र हत्या गर्ने हेतुले विभिन्न व्यक्ति तथा संस्थाबाट अपुष्ट र आधारहीन तरिकाले ममाथि भइरहेको व्यक्तिगत आरोपप्रति मेरो गम्भीर ध्यानाकर्षण भएको छ," बुधबार साँझ सामाजिक सञ्जाललमा उनले लेखेका छन् ।

उनले नेपाली क्रिकेटप्रतिको आफ्नो 'निस्वार्थ भावना' र यसको विकास, विस्तारप्रतिको अठोटमा कदापि पनि परिवर्तन नआउने समेत स्पष्ट पारेका छन् ।

के भन्छन् पारस ?

नेपालको कानुनले कसैलाई पनि बिनाप्रमाण चरित्र हत्या गर्ने वा तर्क नराखी व्यक्तिगत आरोप लगाउने छुट दिएको छैन । नेपालको कानुनले सबैलाई कानुनी उपचारको बाटो खुला राखेको छ । 

नेपाली क्रिकेटसँग सम्बन्धित विभिन्न पक्षहरू र विशेषत: सन्दीप लामिछानेसँग जोडिएको पछिल्लो मुद्दामा सम्मानित जिल्ला अदालतबाट पहिलो तहको फैसला भएको र उच्च अदालतबाट अन्य कुरा प्रस्ट हुँदै जाने नै छ । यो सबैका बीच समेत तर्कहीन तरिकाले मेरो नाम जोडेर चरित्र हत्या गर्ने हेतुले ममाथि भइरहेको नियोजित षड्यन्त्रलाई ढिलो चाँडो कानुनी दायरामा ल्याउने समेत जानकारी गराउन चाहन्छु । 

अन्त्यमा नेपाली क्रिकेटप्रतिको मेरो निस्वार्थ भावना र यसको विकास, विस्तारप्रतिको मेरो अठोटमा कदापि पनि परिवर्तन नआउने समेत सम्पूर्णका बीच संकल्प गर्दछु ।