काठमाडौं । हालैमात्र युट्युबमा राखिएको र हिजो (शनिबार) निकालिएको ‘लुट्न सके लुट कान्छा’ बोलको गीत अहिले चर्चामा छ । लोकप्रिय लोकगायक पशुपति शर्माले गाएको उक्त गीतमा प्रतिबन्ध लगाउनुपर्ने माग सत्तारुढ दलका केही नेताहरुले प्रधानमन्त्री केपी शर्मा ओलीसँग गरेपछि गीतको चर्चा बढेको हो ।
तीव्र चर्चाका बीच गायक शर्माले शनिबार बेलुका युट्युब च्यानलबाट हटाएका थिए । तर, अहिले पनि उक्त गीत युट्युब, ट्विटर तथा फेसबुकमा छ्यापछ्याप्ती पाइन्छ ।
गीतको विषयवस्तुलाई लिएर आपत्ति जनाइनु र त्यसकै कारण युट्युबबाट गीत नै डिलिट गर्नुपर्ने अवस्था आउनुलाई लिएर विभिन्न प्रतिक्रिया आइरहेका छन् । लोकप्रिय लोकगायिका तथा सत्तारुढ दल नेकपाकी नेतृ कोमल वली पशुपति शर्मासँग आफ्नो लामो र राम्रो सहकार्य रहेकोले के गाउन हुन्छ, के हुन्न भन्ने कुरा उनलाई राम्रोसँग थाहा भएको बताउँछिन् । “गीत गाउने स्वतन्त्रता सबैलाई छ, तर, राज्यविरुद्ध नै उत्रिन चाहिँ हुँदैन । उसले रियलाइज गरेर परिमार्जन गरेर ल्याउँछु भनेको छ, त्यो नै ठूलो कुरा हो,” वलीले बाह्रखरीसँग भनिन् ।
पशुपतिको गीतलाई लिएर प्रधानमन्त्री निवास बालुवाटारमा कुनै छलफल नभएको उनले बताइन् । “हिजो (शनिबार) म पनि बालुवाटारमै थिएँ । पीएमले केही कुरा गर्नुभएन यसबारेमा । अरु कसैले पनि केही कुरा गरेन । म हिँडिसकेपछि भएको भए मलाई थाहा छैन । गीतसंगीतको केही कुरा भए मसँग सोध्नुहुन्थ्यो प्रधानमन्त्रीज्यूले,” उनले भनिन् । गीतसंगीतमा नियन्त्रण गर्ने राज्यको कुनै नीति नरहेको उनले बताइन् । वली राष्ट्रिय सभा सदस्य पनि हुन् ।
अर्की लोकगायिका मञ्जु पौडेलले पनि गीतमा प्रतिबन्ध नै लगाइनु गलत भएको बताइन् ।
पुराना लोकगायक कुमार बस्नेतले पनि लोकतन्त्रमा गाली गर्न पाइन्छ भन्दैमा गरिहाल्न नहुने तर राज्यलाई सही बाटो देखाउने काम कलाकारको हुने बताए । “राज्यलाई राम्रो बाटो देखाउने त कलाकारमात्र हैन, सबै नागरिकको दायित्व हो । असल नियतले गरेको छ भने राज्यले सहनुपर्छ,” बस्नेतले भने ।
किन हटाए पशुपति आफैंले गीत ?
सत्तारुढ दल नेकपा सम्बद्ध नेता–कार्यकर्ताको दबाबका कारण गायक शर्माले युट्युब च्यानलबाट गीत हटाएको बताइएको छ । उनले सिधै सरकारले दबाब दिएर गीत हटाउनु परेको नभने पनि घुमाउरो भाषा प्रायोग गर्दै चित्त नबुझेका कुरामा व्यंग्य गर्न पाउनु आफ्नो नैसर्गिक अधिकार भएको बताएका छन् ।
उनले आफ्नो फेसबुक पेजमा लेखेका छन्,
म पनि यही देशको एक सचेत नागरिक साथै कलाकार भएको नाताले देशमा विद्यमान भ्रष्टाचार, घुसखोरी र जिम्मेवारहरुको अकर्मण्यता विरुद्द आवाज उठाउन पाउने मेरो नैसर्गिक अधिकार हो भन्ने कुरामा म दृढ रहेको कुरा दोहोर्याउन चाहन्छु ।
उनले नेपाल वायु सेवा निगमको वाइडबडी विमान खरिद, ३३ किलो सुन प्रकरण, राष्ट्रपतिले चढ्ने भनिएको महँगो हेलिकप्टरसँगै सरकारको बागडोर सम्हाल्नेहरुले गरिरहेको अनियमितताप्रति व्यंग्य गर्दै गीत सार्वजनिक गरेका थिए । उक्त गीतलाई लिएर नेकपा तथा त्यसका भ्रातृ संस्थाहरुले विरोध जनाएको बताइएको छ ।
उनले आपत्ति जनाइएका शब्द निकालेर गीत पुनः लिएर आउने जानकारी दिएका छन् ।
