काठमाडौं । नेपाली कांग्रेस केन्द्रीय कार्यसमितिको अर्को बैठक यही फागुन ९ गते दिउँसो १ बजे बस्ने भएको छ । दुई दिनसम्म चलेको केन्द्रीय कार्यसमितिको बैठकपछि बुधबार साँझ सो पार्टीका मुख्य सचिव कृष्णप्रसाद पौडेलद्वारा जारी वक्तव्यमा सो कुरा उल्लेख गरिएको छ ।
कांग्रेस सभापति शेरबहादुर देउवाको सभापतित्वमा बुधबार बसेको बैठकमा विमलेन्द्र निधिद्वारा नेपाली कांग्रेस केन्द्रीय कार्यसमितिको तर्फबाट महासमितिको बैठकमा प्रस्तुत राजनीतिक प्रस्ताव महासमितिबाट प्राप्त सुझाव सहित परिमार्जन गरी पेश गरिएको थियो ।
त्यस्तै, नेपाली कांग्रेसको भ्रातृ संस्था नेपाल आदिवासी जनजाति संघ र शुभेच्छुक संस्था प्रजातान्त्रिक वन प्राविधिक संघ–नेपालद्वारा स्वीकृतिका लागि पठाइएको विधान छलफलका लागि बैठकमा बुधबार नै गरिएको थियो । बुधबारको बैठकमा केन्द्रीय सदस्यहरु— बालकृष्ण खाण, रमेश रिजाल, महेन्द्र यादव, गोविन्द भट्टराई, श्यामकुमार घिमिरे, बहादुर सिंह (लामा) तामाङ, लक्ष्मी परियार, अमृत अर्याल र अतहर कमाल मुसलमानले आ–आफ्नो धारणा राखेका थिए ।
नेपाल विद्यार्थी संघको केन्द्रीय तदर्थ समिति पार्टी सभापति देउवाद्वारा आवश्यक परामर्श गरी गठन गरिने बैठकपछि जारी वक्तव्यमा उल्लेख छ ।