काठमाडौं । अस्थायी शिक्षक परीक्षाको सम्पूर्ण तहको नतिजा प्रकाशन सकेर अन्तर्वार्ता लिने प्रकृया शुरु भएको छ । तर, अनुत्तीर्ण र गोल्डेन हयान्डसेक रोजेका शिक्षकको विदाइकालागि भने हालसम्म रकमको जोहो हुन सकेको छैन ।
शिक्षक विदाइका लागि शिक्षा मन्त्रालयले रकमको व्यवस्थापन गर्न नसकेको बुझिएको छ । शिक्षक सेवा आयोगका सूचना अधिकारी रामराज खकुरेलले सबै तहको नतिजा र पुर्नयोगको नतीजा प्रकाशनको काम सकेर अन्तवार्ताको प्रकृयामा गइसकेको जानकारी दिए ।
शिक्षा, विज्ञान तथा प्रविधि मन्त्रालयले गोल्डेन हेन्डसेक प्रदान गर्नकालागि ५ अर्ब २५ करोड रुपैयाँको व्यवस्था गरेको छ । शिक्षा तथा मानव स्रोत विकास केन्द्रका महानिर्देशक बाबुराम पौडेलले केन्द्रले मन्त्रालयसँग १० अर्ब रुपैयाँको प्रस्ताव गरेको जानकारी दिए ।
उनले मन्त्रालयसँग ५ अर्ब २५ करोड रुपैयाँको व्यवस्था रहेको बताउँदै भने,‘‘ यति धेरै संख्यामा शिक्षकहरु अनुत्तीर्ण हुने अनुमान गरिएको थिएन । अहिलेको अवस्था हेर्दा १० अर्बले समेत अपुग होला कि भन्ने शंका छ । यद्यपि अन्तर्वार्ता सक्दाको अन्तिम अवस्थासम्म सकभर रकम व्यवस्थापन हुनेछ ।’’
महानिर्देशक पौडेलले भने, “नतिजा प्रकाशन भएको अन्तिम मितिबाट नै गोल्डेन ह्यान्डसेक प्रदान गर्न सुरु गर्छौं । त्यसअवधिमा पैसा व्यवस्थापनको सबै काम सक्छौं । ” उनले जो पहिले नै परीक्षामा बस्दिनँ भन्दै गोल्डेन हयान्डसेक रोजेर बसेका थिए उनीहरुलाई पहिलो प्राथमिकताम राखिएको बताए ।
त्यसपछि जो पहिले आयो त्यसलाई सुविद्या दिने हिसाबले तयारी भइरहेको उनको भनाई थियो । उनले १० अर्ब माग्दा सबैलाई पुग्ने अपेक्षा गरिएको बताउँदै भने,‘‘ तत्कालै उपलब्ध भयो भने सबैलाई एकैपटकमा पु¥याउन पनि सकिन्छ । ’’