विराटनगर । प्रहरीले विराटनगरमा  ६९ लाख ५७ हजार ६ सय रुपैयाँसहित हुण्डी कारोबारमा संलग्न तीन जनलाई पक्राउ गरेको छ । उनीहरुले सहकारीको आडमा अवैध रुपमा पैसा बाहिर पठाउने र भुक्तानी दिने गरेको बताइएको छ ।

जिल्ला प्रहरी कार्यालय मोरङबाट खटिएको प्रहरी टोलीले विराटनगर महानगरपालिका– ७ स्थित आस्था नेपाल बहुउद्देश्य सहकारी संस्थाबाट अवैध हुण्डी कारोबारमा संलग्न रहेका ३ जनालाई आइतबार पक्राउ गरेको हो । पक्राउहरू विराटनगर ७ बस्ने वर्ष ३२ को राजेश हेडा, विराटनगर ११ बस्ने वर्ष २५ को सुमित साह र विराटनगर १२ बस्ने वर्ष ४१ को दिपककुमार कर्ण छन् ।

पक्राउ परेका व्यक्तिहरूमध्ये राजेश हेडा सोही सहकारी संस्थाको अध्यक्षसमेत रहेको जिल्ला प्रहरीका प्रवक्ता डिएसपी घनश्याम श्रेष्ठले बताए । भने,‘‘निजको कार्यकक्षबाट नगद रू. ५९ लाख ७ हजार ६ सय बरामद गरिएको छ ।’’ बरामद रकम श्रोत नखुलेको अवस्थामा बरामद गरिएको श्रेष्ठको दाबी छ । हेडाले उक्त सहकारी संस्थाको आडमा हुण्डी कारोवार गर्दै आएको प्रारम्भिक सोधपुछको क्रममा खुलेको प्रहरीले जनाएको छ ।

प्रहरीका अनुसार उक्त सहकारी संस्थामा सुमित साहको साथबाट ९ लाख ५० हजार रुपैयाँ बरामद भएको छ । निजले उक्त रकम राजेश हेडाबाट बुझी लान लागेको अवस्थामा बरामद भएको बताइएको छ । उक्त सहकारी संस्थाका प्रबन्धक दिपककुमार कर्णलाई समेत अनुसन्धानको क्रममा पक्राउ गरिएको प्रहरीको भनाइ छ । उनीरूलाई थप अनुसन्धान तथा कारवाही राजश्व अनुसन्धान विभाग ईटहरीबाट हुने डिएसपी श्रेष्ठले जानकारी दिएका छन् । 

यसैगरी ईलाका प्रहरी कार्यालय हरैचा मोरङबाट खटिएको प्रहरी टोलीले केही सार्वजनिक अपराध मुद्दाका २ जना फरार प्रतिवादीहरूलाई पक्राउ गरी सम्मानित जिल्ला अदालत मोरङमा बुझाईएको छ  ।  

इप्रका रानीबाट खटिको टोलीले मालसामान, लत्ता कपडा, भाडा वर्तन र गाडीका पार्टपुर्जा गरी अन्दाजी मूल्य रू. १ लाख ९८ हजार ७ सय ७५ बराबरको सामान बरामद गरी आवश्यक कारवाहीको लागि भन्सार कार्यालय रानीमा बुझाइएको जनाइएको छ ।