काठमाडौं । अस्ट्रियाको भियनामा चार दिनसम्म चलेको पर्यटन मेला ‘फेरेन मेस्से विन’ मा रहेको नेपाली स्टलले अधिकांश आगन्तुकको ध्यान खिचेको छ ।
नौ वर्गमिटर क्षेत्रफलको नेपाली स्टलले मेलामा आएका धेरैलाई विश्वको सर्वोच्च शिखर सगरमाथा र अन्य अग्ला हिमालको देश नेपाल भनेर चिनाउन सफल भएको पर्यटन बोर्डले जानकारी दिएको छ । फेरेन मेस्से विन अस्ट्रियाकै सबैभन्दा ठूलो पर्यटन मेला हो ।
पर्यटन बोर्डका अनुसार सन् २०२० को नेपाल भ्रमण वर्षमा २० लाख पर्यटक ल्याउने लक्ष्य लिई बोर्डले नयाँ बजारमा मेला तथा अन्य प्रवद्र्धनात्मक अभियानमा अझ सशक्त सहभागिता जनाइरहेको छ र अस्ट्रियामा पहिलो पटक भाग लिइएको हो । अस्ट्रिया पनि हिमाली देश भएको र अस्ट्रियनलाई पदयात्रा र हिमाल आरोहणलगायत साहसिक क्रियाकलापमा धेरै रुची भएका कारण नेपालप्रति विशेष लगाव देखिएको थियो ।
नेपाली स्टलमा नयाँ पदमार्ग, मौसम र नेपाल पुग्ने रुटबारे प्रश्न सोधिएको थियो भने सगरमाथा आरोहण गरिसकेका आरोहीसमेत स्टलमा आएर नेपालको अभियानमा साथ दिएको बोर्डले जनाएको छ । नेपाल भ्रमण गरिसकेकाहरू आफ्ना साथी, परिवारका सदस्यका साथ आएका थिए भने फेरि नेपाल जान चाहेको बताइरहेका थिए । ट्राभल एजेन्ट्स तथा नेपाल जान चाहने पर्यटकको उल्लेख्य सहभागिता रहेको नेपाली स्टलमा बोर्डले नेपालको नक्सा, पोस्टर, कार्ड ड्राइभ, किरिङ वितरण गरेको थियो ।
अस्ट्रियाका लागि नेपाली राजदूत प्रकाशकुमार सुवेदी र अन्य कर्मचारीले पनि नेपाल स्टलमा आएर जिज्ञासुलाई नेपालबारे जानकारी दिँदै नेपाल जान निम्तो दिएका थिए । मेलामा पर्यटन बोर्डका वरिष्ठ अधिकृत सुधन सुवेदी र कुन्दन शर्मा मिश्र तथा एक्स्प्लोर नेपाल ट्राभल एन्ड एडभेन्चरको सहभागिता थियो ।